Gjermania e mbështet Shqipërinë në BE

Kryetari i Kuvendit, Gramoz Ruçi dhe kryetari i grupit të Partisë Socialiste, Taulant Balla, u pritën në një takim pune në Gjermani nga Presidenti i Bundestagut, Wolfgang Schäuble.

Gjatë bashkëbisedimit palët kanë rikonfirmuar mbështetjen e Gjermanisë për çeljen e negociatave për Shqipërinë.

Kryetari i Kuvendit, Ruçi, rishprehu vendosmërinë për të intensifikuar përpjekjet, në mënyrë që të avancohet me agjendën e reformave që lidhen me integrimin në BE, duke listuar si prioritare për vendin: Reformën në drejtësi, forcimin e shtetit ligjor dhe luftën kundër krimit dhe korrupsionit.

“Vetting-u, si një proces kurajoz dhe unik, po kontribuon për të ndërtuar një sistem drejtësie profesional, të paanshëm dhe me integritet. Reforma në drejtësi i ka tejkaluar pritshmëritë e BE-së për Konferencën e parë Ndërqeveritare dhe se Komisioni i Pavarur i Kualifikimit ka marrë 92 vendime, nga 57 të parashikuara në listën prioritare të gjyqtarëve e prokurorëve. Shumica e organeve të reja të qeverisjes së sistemit janë krijuar ose plotësuar dhe ky proces do të përfundojë brenda pak muajve të ardhshëm, shkruan atsh, përcjell albinfo.ch.

Politika e jashtme e Shqipërisë është një shembull i qartë i afrimit të Shqipërisë me BE-në, ku në çdo rast Shqipëria ka qenë në një linjë me politikën e jashtme të BE-s. Shqipëria mbështet dialogun Kosovë-Serbi, të ndërmjetësuar nga BE dhe nënvizoi rëndësinë e një marrëveshjeje të dy vendeve për garantimin e një të ardhmeje europiane. 

Lidhur me Reformën Zgjedhore është e qartë tashmë se drafti i përgatitur me asistencën e vyer të fondacioneve gjermane Konrad Adenauer dhe Friedrich Ebert, është një dokument integral që adreson plotësisht rekomandimet e OSBE/ODIHR. Opozita duhet t’i qëndrojë angazhimit për ta votuar draftin e depozituar”, theksoi Ruçi.