Tregu i punës për kroatët hapet vetëm gradualisht

Zvicra me protokollin special me BE-në ruan mundësinë që të hapë tregun e saj të punës për kroatët në mënyrë graduale gjatë shtatë viteve të ardhshme

Nga 1 korriku i këtij viti, kur Kroacia është bërë anëtare e Bashkimit Evropian, edhe marrëveshja për lëvizje të lirë brenda shteteve të BE-së dhe Zvicrës është zgjeruar edhe me Kroacinë. Por Zvicra mundet që në rast të ndonjë fluksi të madh të kroatëve në Zvicër te vendosë frenat.

Në të vërtetë Zvicra me protokollin special me BE-në ruan  mundësinë që të hapë tregun e saj të punës për kroatët në mënyrë graduale gjatë shtatë viteve të ardhshme.  

Pas kësaj periudhe Zvicra do të fitojë edhe në periudhë trevjeçare shtesë, në rast se migrimi i kroatëve shtohet me të madhe, bën të ditur Departamenti i drejtësisë i Zvicrës.

Qeveria  e Zvicrës e ka dërguar projektin në parlament për miratim dhe kjo duhet të përfundojë deri më 28 nëntor të këtij viti. Po ashtu qeveria i propozon parlamentit të lejojë një fond prej 45 milionë frangash për të kontribuar në lehtësimin e hyrjes së Kroacisë në BE.