Kapen kosovari dhe serbi duke vjedhur bakër

Dy të dyshuarit, njëri 24 e tjetri 43 vjeç, janë marrë në arrest

Një seri vjedhjesh të bakrit që po ndodhin ditëve të fundit në regjionin e kantoneve Aargau dhe Solothurn ka tërhequr vëmendjen e autoriteteve të atjeshme të sigurisë. Nëpër arealet e fabrikave dhe ndërmarrjeve tjera po vidhen tonelata të tërë bakri, kryesisht në formë telash dhe shinash.

Kështu në mes të mbrëmjes së të shtunës dhe mëngjesit të së dielës në magazinën e firmës “BKS Stromschienen” në Balsthal janë vjedhur disa tonë bakër. Njësoj ka ndodhur edhe në hapësirat e firmës Von Roll, ku janë vjedhur shina prej bakri me vlerë prej disa dhjetëra mijë frangash.

Ndërsa natën e të dielës një qytetar ka vënë re lëvizje të dyshimta në oborrin e një firme në Oensingen. Pas arritjes së saj, patrulla e policisë ka gjetur një shtetas të Kosovës dhe një të Serbisë, në veturën e të cilëve kanë gjetur pjesë të bakrit të vjedhur. Dy të dyshuarit, njëri 24 e tjetri 43 vjeç, janë marrë në arrest.

Policia nuk ka mundur të thotë për gazetën Solothurner Zeitung nëse ka lidhje në mes të rastit në Oensingen dhe atyre në Balsthal dhe vende tjera ku ka pasur vjedhje kohëve të fundit. Ajo është duke i kryer hetimet e nevojshme. Por, siç shkruajnë gazetat tjera zvicerane, mbrapa vjedhjeve masive të sasive të mëdha të bakrit qëndrojnë kryesisht bandat nga Rumania.