Tregu evropian i veturave shënon rënie

Shoqata Evropiane e Prodhuesve të Automobilave ka bërë të ditur se kërkesa për veturat e pasagjerëve në Bashkimin Evropian ka shënuar rënie me 4,6 për qind nga viti në vit.

“Megjithatë, me gati 1.2 milionë njësi gjithsej të regjistruara, kjo ende përfaqëson vëllimin e dytë më të lartë në muajin janar që nga viti 2009”, tha ACEA.

ACEA theksoi se kërkesa për vetura të reja ka rënë pothuajse në të gjithë bllokun 28-anëtarësh, përfshirë pesë tregjet kryesore të BE-së. Spanja dhe Italia shënuan rënien më të madhe, përkatësisht me 8,0 për qind dhe 7,5 për qind, përcjell albinfo.ch.

Në muajin e parë të këtij viti, VW Group ishte prodhuesi më i madh me shitjet, me një pjesëmarrje prej 24,1 për qind. Grupi që prodhon markat Volkswagen, Audi, Skoda, Seat dhe Porsche pa një rënie vjetore prej 6,5 për qind në shitjet e saj, duke arritur 288.266 vetura të pasagjerëve.

PSA Group, prej së cilës markat kryesore janë Peugeot, Citroen dhe Opel, kishte një pjesëmarrje prej 17,1 për qind, ndërsa Renault Group 9,7 për qind. Vitin e kaluar, mbi 15 milionë vetura të reja të pasagjerëve janë regjistruar në BE.