Futbollistët shqiptarë të Zvicrës komunikojnë shqip

"bz Basel" e ka vlerësuar si citat të javës deklaratën e Valon Behramit: “Natyrisht, komunikojmë shqip me njëri-tjetrin. Çdo gjuhë tjetër është shumë e ngadalshme”

Valon Behrami, Xherdan Shaqiri, Granit Xhaka, Blerim Xhemaili dhe Admir Mehmedi kur tubohen me përfaqësuesen e Zvicrës qëndrojnë gjithmonë bashkë, madje edhe komunikimin e zhvillojnë në gjuhën shqipe.

Këtë e ka zbuluar Valon Behrami për “bz Basel”, kur është pyetur si komunikojnë me njëri-tjetrin futbollistët kosovarë.

“Ne shqiptarët e Kombëtares së Zvicrës, natyrisht, komunikojmë shqip me njëri-tjetrin. Çdo gjuhë tjetër është shumë e ngadalshme”, thotë Behrami.

Por trajneri i Zvicrës, Otmar Hitzfeld, thotë se futbollistët me origjinë shqiptare komunikojnë në mënyrë perfekte me pjesën tjetër të skuadrës me gjuhën e futbollit, që në përfaqësuesen e Zvicrës ka shumë më shumë rëndësi sesa origjina e lojtarëve.