Ka fyer kosovaren në baza raciste, 6 muaj me kusht për gjermanin

Sot e atë ditë fëmijët vuajnë nga trauma që kanë marrë me atë rast. Madje vajza, sipas asaj që ka thënë e ëma, nuk pranon më të hipë në autobus

Ka ndodhur në muajin gusht të vitit 2012 në një autobus urban në Meindorf, Siegburg. Një gjerman i dehur 33 vjeçar kishte thirrur parulla kundër të huajve dhe kishte ofenduar rendë një grua kosovare të moshës 45 vjeçare me dy fëmijët e saj të vegjël.

Gjykata në Siegburg, gjermanin e papunë e ka dënuar me 6 muaj burg me kusht, që për kosovaren e ofenduar është dënim tepër i butë.

“Ne u patëm tmerruar kaq shumë”, thotë ajo duke e kujtuar atë ditë. I akuzuari ishte i alkoolizuar rendë dhe thërriste në drejtim të kosovares, të bijës së saj 5 dhe të birit 3 vjeçar: “Heil Hitler” dhe “Juve duhet të ju çojmë në dhoma të gazit”. Pastaj ai ka hedhur shishen e birrës në drejtim të tyre dhe kishte bërë me dorë përshëndetjen hitleriane. Sot e atë ditë fëmijët vuajnë nga trauma që kanë marrë me atë rast. Madje vajza, sipas asaj që ka thënë e ëma, nuk pranon më të hipë në autobus, shkruan generalanzeiger.de.

“Unë nuk e di as vetë se çfarë ndodhi me mua atë ditë”, ka thënë gjermani para trupit gjykues. Ai ka pranuar në tërësi veprën dhe i ka kërkuar falje kosovares. Ai thotë se kishte pirë së tepërmi dhe veç kësaj kishte marrë edhe medikamente kundër depresionit.

Por tashmë i dënuari me kusht, nuk ka qenë i panjohur për drejtësinë. Ai ka qenë edhe më parë i drenuar disa herë për shkaktim të lëndimit trupor, për vjedhje dhe ofendime. Megjithatë nuk ka mundur të dëshmohet që ai të ketë pasur ndonjë lidhje me të djathtën ekstreme ose neonazizmin. Po ashtu asnjëri nga deliktet e tij nuk mund të lidhen me atë skenë.