Kroacia pranon ekstradimin e shtetasve të saj në BE

Me këtë marrëveshje Kroacia ka marrë detyrime që deri në fund të vitit 2013 ta përshtatë me legjislacionin e BE ligjin e saj për ekstradimin

Konflikti në mes të Kroacisë dhe Bashkimit Evropian në lidhje ligjin për ekstradimin ka marrë një përfundim pozitiv. Kroacia dhe Komisioni i BE-së duket të kenë arritur një ujdi në lidhje me ekstradimin në vendet e BE-së të shtetasve kroatë të dyshuar për krime të kryera në ato shtete.

Me këtë marrëveshje Kroacia ka marrë detyrime që deri në fund të vitit 2013 ta përshtatë me legjislacionin e vlefshëm në BE ligjin e saj për ekstradimin. Kështu ka deklaruar ministri kroat i drejtësisë Orsat Miljenic në Bruksel.  Ai ka shtuar se kjo do të realizohet shpejt dhe pa paraqitur kushte.

Vetëm tri ditë para hyrjes së saj në BE, Parlamenti i Kroacisë kishte vendosur që shteti kroat t`i marrë në mbrojtje shtetasit kroatë të dyshuar për krime të rënda, duke mos pranuar ekstradimin e tyre në vendet e BE-së.

I përballur me këtë refuzim, Komisioni i BE-së kishte kërcënuar Kroacinë se nuk do t`i paguante asaj paratë që duhej t`i takonin si anëtare e re e BE-së.