Qyteti i Lucernit ua njeh të huajve të drejtën e bashkëpjesëmarrjes

Ekzekutivi ka kërkuar nga parlamenti që instrumentin e njohur të mocionit të popullit ta zgjerojë edhe te të huajt me leje të përhershme qëndrimi (vizë C)

Të huajt në qytetin e Lucernit duhet të kenë të drejtën t`i drejtohen parlamentit me kërkesa ose të mbështesin kërkesat e të tjerëve. Këshilli i qytetit (ekzekutivi) ka kërkuar nga parlamenti që instrumentin e njohur të mocionit të popullit ta zgjerojë edhe te të huajt me leje të përhershme qëndrimi (vizë C).

Mocioni në fjalë që praktikohet aktualisht në qytetin e Lucernit mundëson që 100 persona me të drejtë vote të kenë të drejtë t`i drejtohen parlamentit me ndonjë kërkesë. Veç kësaj, edhe parlamentet e fëmijëve dhe të rinjve kanë të drejtën për të bërë një postulat në Parlamentin e qytetit, shrkuan nzz.ch.

Parlamenti i qytetit në vitin 2011 pati ngarkuar qeverinë e qytetit përmes një mocioni që edhe të huajve me vizën C tu mundësojë një të drejtë bashkëpjesëmarrjeje  në kuadrin e mocionit të popullit . Pikërisht këtë edhe e ka bërë qeveria duke e prezantuar të hënë (sot) të drejtë në fjalë përmes një raporti të publikuar.

Ndërkaq, në Kantonin e Lucernit nuk ekziston e drejta e të huajve për të votuar. Në mënyrë që e drejta e bashkëpjesëmarrjes për të huajt të mos bjerë në kundërshtim me të drejtën kantonale, e drejta e re nuk do të emërtohet si e drejtë e popullit  por si e drejtë bashkëpjesëmarrjeje në punën e parlamentit, ashtu sikurse edhe te rasti i postulatit të parlamenteve rinore.  Si rrjedhojë, Parlamenti në kuadrin e veprimit të tij duhet të organizohet ashtu që të huajve me vizë C t`ua lejojë të drejtën e paraqitjes së mocioneve.