Rama u kundërpërgjigjet protestuesve: Qeveria nuk preket

foto: reuters/florion goga

Përderisa para Kryeministrisë dhe Parlamentit po bëhej protestë, kryeministri Edi Rama, i cili po mbante një fjalim në Berat me operatorët turistikë të këtij qyteti, tha se askush nuk mund të prekë qeverinë.

“Gjithçka tjetër preket, por qeveria nuk preket, shumica qeverisëse nuk preket, se nuk është një mur që i bie dhe e shemb. Është një mandat i dhënë nga populli dhe vetëm populli gjykon nëse ky mandat duhet të ndryshojë. Por, preket ekonomia e kujtdo. Ata që shkojnë në protestat e organizuara dhe të orkestralizuara për t’u materializuar në dhunë, një pjesë janë rrogëtarë të administrata lokale, tejet të politizuara që bëjnë detyrën ndaj partisë. Mbase për ta llogaria, edhe pse dritëshkurtër, është e thjeshtë, marrin një rrogë, shkojnë në protestë”, tha Rama.

Sipas tij, protestat e tilla janë të llojit që punojnë kundër Shqipërisë.

“U japin argument atyre që nuk na duan të thonë se s’keni as minimumin e maturisë, jeni në epokën e gurit në aspektin politik, se nuk keni kuptuar që mandati i popullit nuk preket, nuk digjen mandatet”, tha Rama, shkruan albinfo.ch.

Sot para Kryeministrisë dhe Parlamentit po mbahet protestë kundër Edi Ramës.

Qytetarët po kërkojnë shkarkimin e tij. Në krye të këtyre protestave qëndron partitë opozitare.