Nuk ka rritje buxheti për asistencën sociale

Megjithatë, një mundësi për rritje të asistencës sociale mund të bëhet nëse arrihen të bëhen kursime brenda buxhetit që e ka Ministria

Buxheti i Ministrisë së Punës dhe Mirëqenies Sociale të Kosovës për vitin 2014 pritet të jetë i njëjtë me atë të këtij viti. Mos rritja e buxhetit për këtë ministri pamundëson edhe ngritjen e asistencës sociale për familjet, të cilat marrin këtë ndihmë, bëjnë të ditur për Radion Evropa e Lirë, zyrtarë të kësaj ministrie.

Megjithatë, një mundësi për rritje të asistencës sociale, sipas Muhamet Gjocajt, drejtor i Departamentit të Mirëqenies Sociale, që funksionon në kuadër të Ministrisë së Punës dhe Mirëqenies Sociale, mund të bëhet nëse arrihen të bëhen kursime brenda buxhetit që e ka Ministria.

Buxheti i Ministrisë për vitin 2013 ka qenë 222 milionë euro. “Nuk mund të thuhet as po as jo, pasi që buxhetin e kemi të njëjtë me atë të vitit 2013. Ministria e Financave na ka bërë me dije që, nëse ne mund të bëjmë kursime brenda këtij buxheti, atëherë mund të bëjmë rritje. Ne kemi premtuar disa ndryshime me plotësim-ndryshimin e Ligjit të skemës së ndihmës sociale dhe nëse arrijmë t’i plotësojmë ato obligime atëherë mund të konsiderohet të ketë rritje”, thotë Gjocaj.

Sipas të dhënave zyrtare të MPMS-së, janë 29 mijë familje me rreth 150 mijë anëtarë, të cilët janë të varur nga asistenca sociale. Shuma e mjeteve të asistencës sociale për këto familje është prej 40 deri në 80 euro në muaj. Kosova ka të krijuar një bazë të politikave sociale, që përbëhet kryesisht nga skema e ndihmës sociale, skema e pensioneve, ku përfshihen pensionet e pleqërisë dhe kontribut-dhënëse, pastaj pensionet e personave me aftësi të kufizuara dhe pensionet e Trepçës.

Feride Hyseni, sekretare e përgjithshme e Kryqit të Kuq të Kosovës, thotë se numri i familjeve që kanë nevojë për ndihma sociale është mjaft shqetësues dhe në rritje. Ajo tregon se Kryqi i Kuq mbështet rreth 18 mijë familje në asistencë sociale. “Përafërsisht ne kemi 18 mijë e 500 familje nevojtare, me siguri ka edhe më tepër. Ne bazohemi vetëm në identifikimin vetjak. Është numër shumë i madh dhe po shtohet dita -ditës”, bëri të ditur Hyseni.

Ajo thotë se familjet, të cilat marrin asistencë sociale nga shteti, jetojnë në kushte të rënda ekonomike e sociale, dhe mjetet që ata i marrin janë të pamjaftueshme, skruan ReL. 

“Edhe ata që kanë përkrahje nga MPMS-ja, vlerë që është diku rreth 60 euro në muaj, nuk mjafton as për gjërat elementare”, shton Hyseni. Të dhënat e fundit të Bankës Botërore kanë ngritur shqetësime të mëdha në Kosovë lidhur me varfërinë. Varfëria ekstreme, e cila përkufizohet si jetesë me më pak se 2.5 dollarë në ditë, në Kosovë ka arritur në 30 për qind, derisa varfëria e moderuar, e cila nënkupton jetesën me 5 dollarë në ditë, ka arritur në rreth 50 për qind.