Opozita në Shqipëri, kundër zgjedhjeve lokale

Dy partitë opozitare në Shqipëri, LSI-ja dhe PD-ja, i janë përgjigjur thirrjes së OSBE-së për zgjedhjet lokale, duke shprehur bindjen se ky proces është thjesht kalimtar në kushtet e shitblerjes së votës përmes grupeve kriminale. 

Nga Shkodra, pas një takimi që pati me qytetarët, kryetarja e LSI-së, Monika Kryemadhi, deklaroi se është e pamundur të përfshihesh në garë pa garantuar më parë zgjedhjet e lira e të ndershme, përcjell albinfo.ch.

“Nuk mund të kesh zgjedhje vendore kur ka një deformim dhe shitblerje të votës përmes grupeve kriminale dhe parave të grupeve kriminale. Zgjedhjet nuk janë gjë tjetër veçse çështje teknike shumë kalimtare. Nëse ne nuk do kemi zgjedhje të lira dhe të ndershme, do të jetë totalisht e pamundur”, ka thënë ajo. 

Ndërsa PD-ja thotë se nuk mund të fitohen zgjedhjet me bandat e kriminelëve. Kjo parti paralajmëron vazhdimin e protestave.