Franca, e kënaqur me zgjedhjet në Kosovë

Mbarëvajtja e përgjithshme e këtyre zgjedhjeve u takon të gjitha palëve, në Beograd dhe në Prishtinë, të cilët kanë favorizuar pjesëmarrjen në zgjedhje, thotë MPJ e Francës

Ministria e Punëve të Jashtme e Republikës së Francës e ka përshëndetur mbarëvajtjen e zgjedhjeve lokale në Kosovë, duke e konsideruar këtë si hap pozitiv për demokracinë në Kosovë. Megjithatë, Franca dënon dhunën e ushtruar nga disa ekstremist në veri, që kanë demoluar vendvotimet.

“Këto ishin zgjedhjet e para lokale të organizuara në gjithë territorin e Kosovës. Niveli i pjesëmarrjes ishte përgjithësisht i kënaqshëm, gjithashtu edhe në komunat serbe të jugut të Kosovës. Kjo është një shenjë e pranimit gjithnjë e më të madh të institucioneve të Prishtinës nga komuniteti serb. Ky është një hap pozitiv për demokracinë në Kosovë”, konsideron MPJ e Francës.

Mbarëvajtja e përgjithshme e këtyre zgjedhjeve, sipas tyre, u takon të gjitha palëve, në Beograd ashtu dhe në Prishtinë, të cilët kanë favorizuar pjesëmarrjen e mirë të votuesve në këto zgjedhje.

“Ajo i takon shumë edhe rolit të lehtësuesit i cili i ishte dhënë OSBE-së në katër komunat në veri të Kosovës. Kjo është po ashtu fakt i angazhimit të Unionit Evropian dhe misionit për vëzhgimin e zgjedhjeve që ka ardhur me këtë rast”, thuhet në deklaruarën e MPJ të Francës.

Megjithatë, shteti francez dënon dhunën e ushtruar nga një pakicë e radikalëve që janë kundër normalizimit të raporteve ndërmjet Kosovës dhe Serbisë, pak para mbylljes së disa vendvotimeve në komunën e Mitrovicës së Veriut.

“Ajo dëshiron që të ndriçohen këto incidente, të cilët u kanë penguar disa qytetarëve të ushtrojnë të drejtën e tyre civile dhe politike”, thuhet më tej në deklaratë.

Franca, po ashtu e përgëzon përfaqësuesen e lartë për politikë të jashtme dhe siguri të Unionit Evropian, Catherine Ashton, për ndërmjetësimin e bisedimeve Kosovë-Serbi, për normalizimin e raporteve ndërshtetërore.