Marrëveshje për turizmin Sharr-Korab

Përfaqësuesit e tri qeverive, Shqipërisë, Maqedonisë dhe Kosovës, nënshkruan të enjten në Tetovë, vizionin e përbashkët për zonën ndërkufitare Sharr-Korab

Trekëndëshi kufitarë ndërmjet Shqipërisë, Maqedonisë dhe Kosovës ofron kushte të përshtatshme për ekoturizëm, por kërkon angazhim institucional për të mbrojtur natyrën nga dora e njeriut. Kështu u tha të enjten në një konferencë mbajtur në Kodrën e Diellit në Tetovë.

Në këtë konferencë ku u diskutua për zhvillimin e turizmit malor në zonën e tre kufirit midis këtyre vendeve, mori pjesë ministri i Mjedisit i Republikës së Maqedonisë, Abdilaqim Ademi, zëvendësministri i Mjedisit i Kosovës, Shpëtim Rudi dhe ministri i Mjedisit të Shqipërisë, Lefter Koka.

Tre përfaqësuesit e nënshkruan vizionin e përbashkët për zonën ndërkufitare Sharr-Korab.

Në këtë konferencë të tre palët shprehën shqetësimin për rrezikun që u kanoset  bukurive natyrore të kësaj zonë nga prerja e pakontrolluar e pyjeve, mbishfrytëzimi i faunës së egër përmes gjuetisë ilegale dhe ndërtimet ilegale.

Ambasadori austriak në Maqedoni, Thomas-Michael Baier këshilloi pjesëmarrësit që të mos i harrojnë problemet ambientale gjatë fazës së tranzicionit dhe rrugës së integrimit të rajonit në BE.

Ai tha se vendi i tij do të mbështesë projekte, që përparësi kanë ruajtjen e natyrës dhe zhvillimin e qëndrueshëm ekonomik, citon “Koha”.

Përmes vizionit të përbashkët, institucionet qeveritare të të tri vendeve synojnë zhvillimin e përbashkët ndërkufitar të turizmit, ruajtjen e trashëgimisë kulturore, promovimin e përbashkët të trashëgimisë natyrore dhe kulturore, menaxhimin e përbashkët ndërkufitar të rajonit dhe promovimin e njohurive tradicionale bujqësore.

Sa i përket zhvillimit të qëndrueshëm ekonomik, palët u dakorduan të identifikojnë vendet me vlera turistike dhe krijimin e infrastrukturës dhe aftësive te nevojshme që do të rrisin përfitimet për komunitetet e këtyre zonave.

Palët po ashtu u pajtuan që të angazhohen për përmirësimin e tregtimit të produkteve bujqësore tradicionale, mbrojtjen dhe promovimin e racave autoktone të kafshëve, identifikimin e mundësive të reja dhe përdorimin e potencialeve ekzistuese për prodhimin efektiv të energjive ekologjike.

Në konferencë morën pjesë dhe drejtuesit e agjencive shtetërore për mjedis, organizata joqeveritare dhe përfaqësues komunal të zonave përreth vargmaleve Sharr-Korab.