250 familje të ngujuara,109 fëmijë pa shkollë

Në Shqipëri janë zyrtarisht 109 fëmijë, të cilët nuk mund të ndjekin shkollën për shkak të ngujimit, pasi familjet e tyre janë të rrezikuara nga gjakmarrja.

Siç raporton gazeta „Shqip“ e Tiranës, kjo është konfirmuar nga zëvendësministrja e Arsimit dhe e Sportit në Shqipëri, Nora Malaj, gjatë konferencës “Sfidat e gjakmarrjes”, organizuar nga Instituti Shtëpia e Drejtësisë dhe Pajtimit Kombëtar.

Për drejtuesin e këtij Instituti, Agim Loci, me fenomenin e gjakamarrjes është abuzuar në Shqipëri për gati 20 vjet, sidomos sa i takon statistikave.

Ai sqaron se numri i viktimave nga gjakmarrja nuk është 6 mijë dhe se 250 familje janë të ngujuara nga ky fenomen.
“Shifrat nuk janë më shumë se 300 të ngujuar, nuk janë më shumë se 700 që vuajnë pasojat e gjakmarrjes, por na duhet një punë e madhe që, ashtu siç e ka shuar Ballkani, duhet ta shuajmë edhe ne, t’i themi ndal vëllavrasjes”, thotë Agim Loci.