Aeroporti i Prishtinës i kthehet normalitetit

Deri tani janë realizuar të gjitha fluturimet, deklaroi për “albinfo.ch” Valentina Gara, zëdhënëse e Aeroportit

Nga aeroporti i Prishtinës, “Adem Jashari”, janë realizuar të gjitha fluturimet deri tani, ka njoftuar zyrtarë të Aeroportit. Madje nga fluturimet që kishin dështuar dje janë realizuar gjatë ditës, ka bërë të ditur Valentina Gara, zëdhënëse e Aeroportit.

Deri në mesditë Aeroporti i Prishtinës funksional

Mjegulla që ka përfshirë dy javët e fundit Kosovën, Maqedoninë dhe një pjesë të Serbisë, ka vështirësuar dukshëm transportin rrugor, ndërsa në disa vende ka paralizuar tërësisht ajroqarkullimin.

Derisa aeroporti në Shkup dje ka qenë jashtë funksionimit, në Prishtinë sot në mëngjes gjithçka ka qenë në rregull.  

“Deri në ora 11 janë realizuar dhjetë fluturime, ndërsa nëse gjendja vazhdon kështu gjithçka do të jetë në rregull”. Kështu deklaroi për “albinfo.ch” Valnatina Gara, zëdhënëse e Aeroportit Ndërkombëtarë “Adem Jashari” në Prishtinë.

“Dukshmëria është në nivelin e duhur. Deri në ora 11 janë realizuar dhjetë fluturime, ndërsa gjendja vazhdon të jetë relativisht e mirë”, deklaroi Gara, sipas të cilës, pritjet në aeroport janë të zakonshme.

Sipas zëdhënëses së Aeroportit, dje gjendja ka qenë më e vështirësuar, pasi që për shkak të mjegullës janë anuluar disa fluturime.

“Dje dhjetë fluturime janë realizuar, 10 janë anuluar, kurse 6 janë dërguar për në Aeroportin “Nënë Tereza” në Tiranë”, deklaroi ajo.

Edhe nga aeroport “Aleksandri i Madh” në Shkup dje ka qenë tërësisht i paralizuar. Bashkatdhetarët janë detyruar të aterojnë dhe nisen ose nga aeroporti i Ohrit ose i Tiranës.