Kolona të gjata të mërgimtarëve edhe në Kosovë

Pritjet më të gjata janë kryesisht në pikë-kalimeve kufitare Merdare dhe Dheu i Bardhë, ku bashkatdhetarët kanë pritur deri në 4 orë

Gjatë dy ditëve të vikendit, janë krijuar kolona të gjata deri në tri kilometra në pikëkalimet që lidhin Kosovën dhe Serbisë, raporton Departamenti i Policisë Kufitare të Kosovës. Kolonat janë krijuar në kufirin e Merdares dhe të Dheu i Bardhë, derisa në Muqibabë e Mutivodë ka më pak pritje.

Sipas të dhënave nga Policia e Kosovës, në kufirin e Merdares është shtuar edhe një korsi shtesë e kontrollit, me qëllim që të shpejtohet kalimi i mërgimtarëve, por procesi po ecë më ngadalë në anën e Serbisë.

“Deri të krijimi i kolonave ka ardhur si rezultat i fluksit të madh të automjeteve, por edhe i problemeve, procedurave qe aplikon pala serbe me plotësimin e formularëve hyrje-dalje gjatë kalimit kufitar”, njofton Policia e Kosovës.

Njëkohësisht Policia apelon tek qytetaret që mundësisht të shfrytëzojnë edhe pikë kalimet tjera kufitare, si atë në Mutivode dhe Muqibabës, pasi që atje kohëzgjatja e kontrollit kufitar është normale.

“Edhe në këto pikë kalime kufitare aplikohen – kalohet me dokumentacionet e njëjta si në pikat tjera kufitare”, njofton policia.

Ndryshe, pritjet më të gjata janë kryesisht në pikë-kalimeve kufitare Merdare dhe Dheu i Bardhë, ku bashkatdhetarët kanë pritur deri në 4 orë. Ndërsa sa i përket pikë-kalimit kufitarë në Mutivodë, në dalje pritjet janë të shkurtra në kohëzgjatje normale prej 10-20 minutave.

 “Kohëzgjatja e pritjeve në pikë-kalime kufitare po ndryshon varësisht prej frekuentimit të automjeteve, frekuentim ky i cili gjatë vikendit është më i theksuar dhe kjo kryesisht ka ndikuar në krijimin e pritjeve”, thuhet më tej në njoftimin e Policisë së Kosovës.