Franca e vë Kosovën në listën e vendeve të sigurta

Qeveria franceze ka marrë vendim që ta vendos Kosovën në listën e shteteve të sigurta. Ky vendim dëshmon se Franca nuk pranon më refugjatë nga Kosova

Më 28 dhjetor të vitit 2013, Republika e Francës ka vendosur që Kosovën ta rangojë në listën e vendeve të sigurta, me çka edhe shuan ëndrrat e kosovarëve për azil në këtë shtet. Këtë vendim të Qeverisë franceze e konfirmoi sot në Prishtinë ambasadoren e Francës në Kosovë, Maryse Daviet

 

Ambasadorja e Republikës së Francës në Kosovë, Maryse Daviet, u shpreh e kënaqur që Qeveria franceze ka marrë vendim që ta vendos Kosovën në listën e shteteve të sigurta, duke theksuar se kjo do të thotë se Franca e vlerëson Kosovën shtet me demokraci të plotë, të sigurt për të gjithë qytetarët.

 

“Qytetarët e Kosovës mund të pajisen me viza legale për të vizituar Francën, por nuk mund të aplikojnë për azil politik, sepse kërkesat e tilla do të refuzohen. Ky rangim është lajm i mirë për Kosovën, për vendin tim dhe gjithashtu është lajm i mirë edhe për qytetarët e Kosovës”, tha ambasadorja Daviet.

 

Këto komente diplomatja franceze i bërë pas një takimi që zhvilloi me Ministri i Punëve të Jashtme i Kosovës, Enver Hoxhaj.

 

Pas takimit,ky i fundit e ka çmuar lart mbështetjen e madhe të Francës për Kosovën, duke veçuar përkrahjen që po jep shteti francez në njohjen ndërkombëtare, në anëtarësimin e Kosovës në organizata të ndryshme rajonale dhe evropiane.

 

Hoxhaj tha se vendimi që ka marrë Franca, që Republikën e Kosovës ta rangojë në listën e vendeve të sigurta, duhet të kuptohet në tri dimensione. E para, sipas Hoxhajt, flet për atë që Republika e Kosovës është një vend ku sundon ligji, është vend demokratik dhe ku respektohen liritë themelore.

 

Së dyti, rangimi i Kosovës në listën e vendeve të sigurta, siç tha ministri, flet për atë që Kosova do të ketë një agjendë tjetër në procesin e liberalizimit të vizave, por në të njëjtën kohë nuk ka nevojë që qytetarët e Kosovës të bëjnë përpjekje që të aplikojnë për azil në Francë, “meqë kërkesat e tilla për azil nuk do të pranohen”.

 

“Dhe dimensioni i tretë është që rangimi i Kosovës si vend i sigurt flet për imazhin që Franca, qytetarët dhe institucionet e saj e kanë për Kosovën dhe për progresin që është arritur këtu. Padyshim se është një lajm i madh për Kosovën dhe për relacionet ndërmjet Francës dhe Kosovës”, deklaroi ministri Enver Hoxhaj.

 

Ndryshe, Franca ka qenë shteti më i preferuar i kosovarëve për kërkim azili.

/albinfo.ch/

---