Pikturat e Mulliqit në pulla postare

Janë katër pulla postare, të cilat janë lëshuar të hënën në qarkullim si pjesë e emisioni më të ri të Filatelisë së Postës së Kosovës

Posta e Kosovës ka ndërkombëtarizuar veprat e piktorit më me famë në Kosovë, Muslim Mulliqit duke i vendosur në pulla postare. Janë katër pulla, të cilat janë lëshuar të hënën në qarkullim si pjesë e emisioni më të ri të Filatelisë së Postës së Kosovës.

“Muslim Mulliqi, i cilësuar si pionier i artit modernist në hapësirat shqiptare, në pikturat e tij si element të rëndësishëm i ka kokat, të cilat përcjellin ankthin, mallin, pritjen dhe shikimin jashtë dritareve, piktura të teknikës së vajit mbi pëlhurë dhe mbi dru, në të cilat ndërthuret folklorizmi me bashkëkohoren”, thuhet në njoftimin e PTK-së.

Veprat e stilit figurativ ekspresionist të Mulliqit, siç thuhet më tej, trajtojnë ambientin kosovar, mirëpo autori e tejkalon sfondin territorial lokal duke kërkuar universalen dhe lirinë e shprehjes artistike.

“Artisti veçon kullat, që janë në formën e personazheve të kompozuara me figura njerëzore”, thuhet në njoftim.

Muslim Mulliqi ishte njëri ndër themeluesit dhe dekani i parë i Akademisë së Arteve në Prishtinë, ndërsa prej vitit 1980 ishte anëtar i Akademisë së Shkencave dhe të Arteve të Kosovës.

Mulliqi ekspozoi në Kosovë, në hapësirat e ish-Jugosllavisë, në Romë, Tiranë, etj. Punoi si profesor i pikturës në Fakultetin e Artit, Universiteti i Prishtinës. Veprat e tij gjenden në shumë galeri, muze si dhe te koleksionistët. Piktori Muslim Mulliqi u lind më 1934 në Gjakovë, ndërkaq vdiq në Prishtinë, në vitin 1998.

Filatelia e Postës së Kosovës, siç thuhet më tej në njoftim, do të prezantojë edhe në të ardhmen përmes pullave postare veprat e artistëve tanë.