Numri 2 i albinfo.ch në duart e lexuesve

Revista albinfo.ch vitin e ri e fillon me numrin e dytë të saj që sapo ka dalë nga shtypi

Ky numër u ofron lexuesve një përzgjedhje më të madhe të temave, në një faqosje më moderne e të bukur. Edhe artikujt që mund të  lexohen në këtë numër merren kryesisht me preokupimet e komunitetit shqiptar në Zvicër, integrimin e tyre, aktivitetet politike, kulturore e shoqërore.

Por, albinfo.ch në numrin e saj të dytë ju sjell edhe portrete dhe intervista njerëzish të suksesshëm nga bota e politikës, kulturës, religjionit dhe biznesit që janë pjesë e këtij komuniteti.

Aty mund të lexoni për telashet e të huajve që duan të marrin shtetësinë zvicerane, për shqiptarin (e besimit mysliman) që garon në zgjedhjet lokale si kandidat i një partie të krishterë, për gruan shqiptare që udhëheq me një kolektiv prej 80 punëtorësh të ndërtimtarisë, për priftin shqiptar që punon në kishën katolike të Zvicrës dhe që përpiqet të bëjë punë ekumenike në mes të religjioneve… dhe për shumë gjëra tjera me interes.

Numri i dytë i revistës albinfo.ch do të jetë këto ditë në duart e lexuesve. Ajo mund të gjendet  në të gjitha pikat që frekuentohen nga shqiptarët në Zvicër: në klubet, shoqatat, entet, lokalet e argëtimit, shitoret.

Albinfo.ch, në versionin digjital dhe në atë të shtypur synon të jetë një zë autentik i shqiptarëve në Zvicër. Duke frekuentuar dhe shfletuar atë, ju ndihmoni që ky zë  i juaji të jetë edhe më i fuqishëm!