Detaje nga rasti që tronditi Laçin

Përplasja me armë mbrëmjen e të dielës në qytetin e Laçit u mori jetën dy kushërinjve Mikel Jushi e Jani Jushi.

Vizion Plus ka mundur të sigurojë foton e dy viktimave, ndërsa mësohet se njëri prej tyre ka qenë dhe ish-futbollist.

Kevin Jushi, i cili së fundmi mbante emrin Jani Jushi, ka qenë futbollist i ekipit të Laçit dhe atij të Kastriotit.

Dy viktimat njiheshin si njerëz të qetë, ndërsa Mikeli ishte dhe pronar i një lokali në qendër të qytetit të Laçit, përcjell albinfo.ch.

Shkak i ekzekutimit të dy të rinjve u bë një konflikt i çastit në një lokal ku dy palët kanë dalë jashtë për t’u sqaruar.

Gjatë këtij momenti autorët, të cilët janë identifikuar nga policia si Markel Bushi 25 vjeç, Vincens Pali (Bushi) dhe Manuel Bushi 23 vjeç kanë nxjerrë armët duke detyruar viktimat që të largohen me vrap.

Por autorët i kanë ndjekur ata për rreth 100 metra dhe më pas kanë hapur zjarr drejt tyre.

Si pasojë e plagëve të marra dy viktimat kanë ndërruar jetë në një spital privat në Tiranë. Sipas policisë, dy prej autorëve janë vëllezër dhe tjetri kushëri i tyre.