Papunësia në Zvicër ka shënuar rritje gjatë tremujorit të tretë të vitit 2026. Sipas të dhënave të publikuara nga Zyra Federale e Statistikave (BFS), shkalla e papunësisë arriti në 5.6 për qind gjatë periudhës korrik-shtator, krahasuar me 5.1 për qind në të njëjtën periudhë të vitit të kaluar, transmeton albinfo.ch.
Sipas përkufizimit të Organizatës Ndërkombëtare të Punës (ILO), në Zvicër janë regjistruar gjithsej 288 mijë persona të papunë, apo 27 mijë më shumë se një vit më parë.
Kjo përqindje përfshin personat e moshës 15 deri në 74 vjeç, të cilët nuk kanë ushtruar ndonjë aktivitet pune gjatë javës referuese, kanë kërkuar aktivisht një vend pune gjatë katër javëve paraprake dhe kanë qenë të gatshëm për të filluar punën. Për këtë kategori nuk kërkohet domosdoshmërisht regjistrimi në një qendër rajonale të ndërmjetësimit të punësimit.
Ndërkohë, numri i personave të punësuar në Zvicër ka shënuar një rritje prej 0.5 për qind krahasuar me vitin paraprak.
Rritje të papunësisë është regjistruar edhe në Bashkimin Evropian, ku shkalla përkatëse është rritur nga 6 në 6.2 për qind. Megjithatë, rritja në Zvicër ka qenë më e theksuar, me 0.5 pikë përqindjeje, kundrejt 0.2 pikëve në BE.
Të dhënat për periudhën korrik-shtator janë publikuar nga Zyra Federale e Statistikave më 12 nëntor 2026./Albinfo.ch