Studentët e diasporës kërkojnë depolitizim të arsimit

Studentët shqiptarë në Skandinavi, mbështesin studentët në Kosovë për një depolitizim të arsimit, ndërsa i bën thirrje qeverisë që t'i marrë parasysh shqetësimet e studentëve

Studentët shqiptarë në shtetet e Skandinavisë shprehen të shqetësuar me gjendjen e fundit në Universitetin e Prishtinës, duke kërkuar që sistemi arsimor në Kosovë të depolitizohet. Studentët e diasporës kërkojnë edhe nga studentët, por edhe institucionet kosovare, që
shqetësimet t’i zgjidhin nëpërmjet rrugëve demokratike.

Organizata “Rinia dhe Studentët Shqiptar në Norvegji” (Albansk ungdom og studentforening) si dhe Rrjeti Rinor në Danimarkë, shkruajnë një letër të hapur studentëve shqiptar si edhe institucioneve shtetërore të Kosovës.

“Duke parë dhe duke ndjekur me interes zhvillimet e fundit në fushën e arsimit në Kosovë, besojmë dhe mbështesim fuqishëm studentët e Kosovës në rrugën e tyre paqësore për të reformuar sistemin aktual universitar, si dhe dënojmë çfarëdolloj akti të dhunës të përdorur në një shtet demokratik”, thuhet në letër.

Arsimi universitar, sipas tyre, është dija dhe e ardhmja e një kombi, i cili ndikon direkt në formimin e elitës dhe zhvillimit të një vendi.

“Duke u mbështetur në modelet demokratike perëndimore, ne mendojmë se Rektorati, si instituti më i lartë i arsimit të Kosovës, duhet të jetë i depolitizuar dhe i menaxhuar nga specialistë të kualifikuar”, thuhet në letrën e studentëve shqiptarë të Skandinavisë.

Menaxhimi i mirë dhe depolitizimi i një institucioni të tillë, sipas studentëve në mërgatë,  sjell zhvillimin e tij  të mëtejshëm dhe e bën atë konkurrent në rajon dhe me gjerë.

“Ne si organizata studentore në diasporë, jemi informuar rreth shqetësimeve dhe pretendimeve të studentëve në Kosovë për një politizim të theksuar si edhe për një mungesë profesionale të menaxhimit të rektoratit, institucionit më të lartë arsimor të Kosovës

Lëvizja studentore, sipas studentëve të mërgatës, është fuqia më e madhe që mund të ketë një shtet demokratik. Prandaj, me anë të kësaj letre studentët e diasporës mbështesin studentët në Kosovë për një depolitizim të arsimit, ndërsa i bën thirrje qeverisë që t’i marrë
parasysh shqetësimet e studentëve.