Zgjedhjet rrezikojnë regjistrimin e bujqësisë

Nëse zgjedhjet parlamentare mbahen në qershor atëherë ka rrezik që regjistrimi i bujqësisë të shtyhet për vitin tjetër

Institucionet e Kosovës kanë planifikuar që këtë vit të regjistrojnë fuqinë bujqësore kosovare, në mënyrë që pas 54 viteve, Prishtina zyrtare të ketë statistika të plota rreth bujqësisë. Regjistrimi i fundit i bujqësor në Kosovë është bërë në vitin 1960, në kohën e Ish-Jugosllavisë së hershme.

Mirëpo, sipas zyrtarëve në Prishtinë, nëse vendoset që zgjedhjet parlamentare të mbahen në qershor, atëherë ka rrezik që proces të shtyhet për të dytën herë. Herën e parë regjistrimi i bujqësisë u shyta për shkak të zgjedhjeve lokale, raporton KTV.

Adil Behramaj ka bërë të ditur se regjistrimi i bujqësisë do t’i ndihmonte në masë të madhe kësaj ministrie për ndërtim të politikave për zhvillim të këtij sektori.

Projekti për regjistrimin e bujqësisë do të bëhet nga Agjencia e Statistikave të Kosovës dhe kap vlerën e 4.7 milionë eurove. Rreth 2.3 milionë euro, siç thuhet, kanë mbetur nga regjistrimi i fundit i popullsisë, kurse pjesa tjetër do të financohet nga Komisioni Evropian dhe buxheti i Kosovës.

Ligji për regjistrimin e bujqësisë parasheh që mbledhësit e të dhënave të realizojnë regjistrimin në formatin derë me derë.

Ky ligj, i miratuar në Kuvendin e Kosovës në dhjetor të 2012-ës, ka paraparë edhe dënime, në rast se keqpërdoret regjistrimi. Gjobat parashihet të jenë nga 250 më e vogla e deri në 5000 euro gjoba më e lartë, në rast se shkelet ligji, si nga personat e angazhuar për regjistrim ashtu edhe i intervistuari.

Ndryshe, sipas statistikave të përgjithshme rreh 62 për qind e popullsisë së Kosovës jetojnë nëpër zona rurale. Por, deri më tani ka munguar një strategji për zhvillimin e bujqësisë. Vitin e kaluar, ndërkaq Ministra e Bujqësisë ka hartuar strategjinë kombëtare për zhvillimin e bujqësisë për periudhën 2013-20120.