S’ka më kredi të buta për zyrtarët

Qeveria e Shqipërisë ua ndaloi kreditë e buta zyrtarëve të shtetit, pasi u vërtetua se këto kredi u keqpërdorën nga militantët partiakë

Qeveria e Shqipërisë shfuqizoi të mërkurën vendimin që të mos i trajtojë më në mënyrë të privilegjuar zyrtarët e lartë të shtetit për marrjen e kredive të buta.

Këtë vendim e konfirmoi për media, ministrja e Zhvillimit Urban dhe Turizmit, Eglantina Gjermeni.

Sipas kësaj të fundit, fondet e planifikuara në buxhet për zyrtarët e shtetit, do të kalojnë për kategoritë në nevojë për strehim, përfshirë këtu familjet që banojnë në ish-pronën e subjekteve të shpronësuara. Sipas ministres Gjermeni, këto familje përfitojnë kredi me 0 për qind interes.

“Auditimi i kryer nga Ministria e Zhvillimit Urban dhe Turizmit zbuloi fakte tronditëse. Programi i kredive të lehtësuara për zyrtarët dhe funksionaret politikë u përdor për të mbështetur militantët partiak, në mënyrë të njëanshme, duke mos adresuar problemet e qytetarëve më në nevojë për strehim dhe me të ardhura të ulëta”, deklaroi Gjermni.

Raporti i auditimit të brendshëm të Ministrisë, sipas saj, dëshmoi se zyrtarë kanë përfituar kredi pa plotësuar asnjë lloj kriteri.

“Janë gjetur raste të trajtimit me kredi për shtëpi të funksionarëve që kanë në pronësi 1 ose 2 shtëpi. Zyrtarë të lartë dhe funksionarë politikë kanë përfituar një kredi të dytë për të blerë banesë jashtë vendit të ushtrimit të detyrës, madje dhe në zona turistike”m deklaroi ministrja.

Për të gjitha këto shkelje, siç deklaroi Gjermeni, është njoftuar Prokuroria shqiptare. “Kjo dëshmojnë qartë se zyrtarët e veshur me pushtet janë trajtuar ndryshe nga qytetarët në nevojë, janë privilegjuar në kundërshtim me ligjet në fuqi”, theksoi ministrja e Zhvillimit Ekonomik.