9 vjet burg kosovarit për tentimvrasje të ish partneres

Vetëm falë ndërhyrjes urgjente kirurgjike dhe fatit kosovarja 22 vjeçare kishte shpëtuar nga vdekja

Një 28 vjeçar nga Kosova është dënuar me nëntë vjet burg për tentim vrasje të ish partneres së tij po ashtu kosovare. Ai e kishte qëlluar atë me armë zjarri në pjesën e pasme të kokës para syve të turmës pranë një supermarketi në Alpen, Gjermani. Vetëm falë ndërhyrjes urgjente kirurgjike dhe fatit kosovarja 22 vjeçare kishte shpëtuar nga vdekja.

Për shkak të peshës së krimit, Gjykata e Landit në Klewe në vendimin saj e ka cilësuar atë si tentim vrasje të rëndë. Dorasi, për shkak të një bllokimi në revole, kishte arritur të shkrepte vetëm një plumb. Nga ana tjetër ai, në mbrojtjen e tij ka thënë se nuk ka pasur qëllim vrasjen. Ai vetëm ka dashur t`ia tërheqë asaj për herë të fundit vërejtjen, për të shmangur gjakmarrjen në mes të dy familjeve.

Ndërsa trupi gjykues nuk ka mundur të qartësojë motivin që ka sjellë te tentimvrasja. Mbetet e paqartë nëse bëhet fjalë për gjakmarrje, delikt nga lëndimi i sëmurë i sedrës ose nga dëshpërimi përndarjen. Për mbrojtësin e kosovarit, një dënim në mes tre dhe katër vitesh burg do të ishte adekuat me veprën e klientit të tij.

Pas krimit, i akuzuari kishte ikur jashtë Gjermanisë dhe gjashtë javë më vonë ishte arrestuar në Shqipëri përmes një fletarresti ndërkombëtar, shkruan rp.online.de.

Pas prishjes së lidhjes në es të dy të rinjve, që ishte aranzhuar nga prindërit e tyre, familjet ishin armiqësuar. Ndër shkaqet e armiqësisë në mes tyre ishte edhe ai se kush do të paguante shpenzimet e dasmës.

Me vendimin gjyqësor, i dënuari duhet tì paguajë viktimës dëmshpërblim prej 10 mijë eurosh.