Ndalohen edhe dy zyrtarë serbë të Kosovës, reagon kryeministri

Srdjan Jovanoviq, këshilltar në zyrën e Kryeministrit dhe Srecko Spasiq, këshilltar në Ministrinë e Bujqësisë, Pylltarisë dhe Zhvillimit Rural, janë ndaluar nga ana e autoriteteve serbe në vendkalimin kufitar Dheu i Bardhë.

Lajmin e ka bërë të ditur vetë kryeministri Haradinaj, me anë të një postimi në Facebook.

Haradinaj e ka quajtur të papranueshëm keqtrajtimin e zyrtarëve serbë të Qeverisë së Kosovës.

“I papranueshëm keqtrajtimi i vazhdueshëm i zyrtarëve të Qeverisë së Kosovës nga autoritetet serbe. Sot në vendkalimin kufitar Dheu i Bardhë janë ndaluar nga autoritetet serbe Srdjan Jovanoviq, këshilltar në zyrën time dhe Srecko Spasiq, këshilltar në Ministrinë e Bujqësisë, Pylltarisë dhe Zhvillimit Rural. Keqtrajtimet e vazhdueshme të autoriteteve serbe janë provokim dhe agresion i Serbisë ndaj Kosovës. Kjo tregon se politika agresive e Serbisë nuk ka të ndalur dhe bllokuesit kryesorë të normalizimit të marrëdhënieve janë autoritet serbe”, ka shkruar Haradinaj.