Smith tregon se për çka në të vërtetë, flet filmi “Aladdin”

Aktori i njohur, Will Smith, që luan rolin e xhindit në rikrijimin e filmit “Aladdin”, tha se projekti i ri është letër dashurie për Lindjen e Mesme, prej kah e ka prejardhjen edhe personazhi kryesor.

50-vjeçari në takimin e parë me regjisorin Guy Ritchie, i cili e ka realizuar këtë film, kishte thënë se ai duhej të ishte si një letër dashurie për rajonin dhe shpreson që fëmijët të frymëzohen nga filmi.

“Kam kaluar shumë kohë në Lindje të Mesme dhe përvojat që i kam këtu nuk i shihni nëpër reklamat televizive në SHBA. Për mua ishte e rëndësishme që filmi shfaq para botës bukurinë e këtij rajoni ashtu siç e shoh edhe unë”, tha aktori, transmeton albinfo.ch.

Filmi i ri përcjell klasikun e vitit 1992, në të cilin Aladdini bie në dashuri me Princeshën Jasmine, por regjisori Guy Ritchie tha se është dashur ta ripërtërijë tregimin e Aladdinit.

Aladdin është rikrijimi më i ri i studios filmike Disney që ka ngjallur filmat vizatimorë, si “Librin e Xhunglës dhe “Dumbon”, ndërsa shumë shpejt do ta publikojë edhe hitin e verës, “Mbretin Luan”.