Persona të maskuar sulmojnë sallën për stërvitje të shqiptarit

Në përleshje janë përdorur shkopinj bejsbolli dhe sulmuesit kanë qenë të maskuar. Te sulmuesit janë parë edhe armë zjarri. 6 veta kanë pësuar lëndime serioze

Një grup prej më shumë se dhjetë personash të paidentifikuar kanë sulmuar mbrëmjen e të hënës qendrën sportive Superpro, Reinach (BL) ku ndodhet lokali për trajnim të thaiboxit që udhëhiqet nga thaiboksieri kosovar Shemsi Beqiri. Me këtë rast është shkaktuar një përleshje masive ku dhuë kanë ushtruar të dyja palët dhe  siç njofton policia,  gjashtë persona kanë pësuar lëndime dhe janë trajtuar me thyerje eshtrash në spital.

Në momentin e sulmit, në sallë ka pasur edhe fëmijë që ushtronin.

Në përleshje janë përdorur shkopinj bejsbolli dhe sulmuesit kanë qenë të maskuar. Te sulmuesit janë parë edhe armë zjarri, njofton “Aargauerzeitung.ch”.

Policia ka mundur të arrestojë vetëm një person të përfshirë. Nuk ka të dhëna për motivin dhe shkasin e përleshjes. Policët nuk mund ta konfirmojnë as versionin e përhapur sipas të cilit sulmi ka lidhje me delinkuentin e njohur me emrin “Carlos”, i cili është stërvitur më parë në këtë qendër, nga Shemsi Beqiri, me pagesën e bërë nga shteti.

Vetë Beqiri ka qenë i dyshuar në raste tjera për ushtrim dhune dhe kërcënimi.

Siç ka shkruar edhe albinfo.ch, Carlosi, me vendimin e Gjykatës Federale është shpallur i pafajshëm dhe është liruar nga vuajtja e mëtejme e dënimit.