Shpërndahet Parlamenti i Maqedonisë

Deputetët e Kuvendit të Maqedonisë votuan sot shpërbërjen e Legjislativit. Pro shpërbërjes kanë qenë 117 ligjvënës, ndërsa asnjë nuk ka qenë kundër.

Deputetët e Kuvendit të Maqedonisë votuan të mërkurën mbrëma votuan iniciativën e Bashkimit Demokratik për Integrim për shpërndarjen e Kuvendit maqedonas, me çka edhe zyrtarisht i hapet rruga zgjedhjeve të parakohshme parlamentare. Pro shpërbërjes së Kuvendit kanë qenë 117 ligjvënës, ndërsa asnjë nuk ka qenë kundër.

Kjo iniciative, sipas iniciuesve të BDI-së, është rezultat i dështimit të idesë për një president konsensual.

“Sot teksa debatojmë për shpërndarjen e kuvendit që erdhi si pasoj e mospranimit të ofertës sonë, ne me të drejtë konstatojmë se kemi akoma shumë rrugë për të arritur  në shkallën e pjekurisë dhe guximin politik për të marrë vendime historike për vendin”, deklaroi Nexhati Jakupi nga BDI.

Organizimi i zgjedhjeve të parakohshme parlamentare, sipas tij, është në favor të përmirësimit dhe avancimit të dialogut dhe raporteve me vendet fqinje si dhe mundësi për hapjen e temave në interes të qytetarëve.

Partia më e madhe maqedonase, VMRO-DPMNE, e kishte kundërshtuar idenë e BDI-së për të pas një president konsensual.

“Kërkesën e BDI-së për kandidat konsensual, ne në asnjë moment nuk e përjetuam si të sinqertë dhe me qëllim të mirë… Për ne përputhja e zgjedhjeve parlamentare dhe atyre presidenciale është mënyrë se si të shmanget skenari në të cilin RM-ja nuk do të mund të zgjidhte president të saj dhe do të ishte e detyruar të shkonte në ndryshime kushtetuese”, u shpreh Silvana Boneva, VMRO-DPMNE. 

Opozita kërkoi që të zbardhen shantazhet ndërmjet partnerëve të koalicionit, raporton “alsat-m”.

Deputetët e LSDM theksuan se situata dhe skenaret e tilla janë planifikuar dhe hartuar nga partitë e koalicionit. “Loja juaj përfundon sot, dhe se tani fjalën do ta kenë qytetarët”, theksoi deputeti i LSDM, Igor Ivanovski duke akuzon për skenar të përbashkët Gruevskin dhe Ahmetin.

PDSH-ja me mbështetjen e kësaj iniciative, shpreson se do i vjen fundi politikës servile dhe se vijnë ditë më të mira për shqiptarët.