Qeveria inicion ndryshimin e Kushtetutës

Qeveria e Kosovës inicioi ndryshimet Kushtetuese që lidhen me themelimin e Forcave të Armatosura të Kosovës

Qeveria e Kosovës ka aprovuar të enjten nismën për ndryshimin e Kushtetutës së Kosovës që parashikon nenet që lidhen me themelimin e Forcave të Armatosura të Kosovës. Po ashtu kabineti qeveritar e dërgoi për në Kuvend Projektligjin për Zgjedhjet e Përgjithshme në Republikën e Kosovës.

Kryeministri Hashim Thaçi e konsideroi të domosdoshme ndryshimin Kushtetutës në çështjet që lidhen me sektorin e sigurisë.

“Amendamentet në Kushtetutën e Republikës së Kosovës, janë bërë me qëllim te reflektimit të misionit të ri mbrojtës të mekanizmave në Republikën e Kosovës, që më pas do të pasohet me një kornizë ligjore te kompletuar për misionin e ri që do të kenë Forcat e Armatosura të Kosovës”, deklaroi Thaçi.

Me këto propozime të amendamenteve në Kushtetutën e Republikës së Kosovës, sipas tij, po bëhet edhe më i qartë vizioni i Republikës së Kosovës që të bëhet një forcë e stabilitetit dhe sigurisë për popullatën e saj për rajonin dhe më gjerë.

“Njëherit, të gjithë këta hapa që po ndërmerr Qeveria e Republikës së Kosovës, janë në pajtim me aspiratat e Republikës së Kosovës që të bëhet pjesë përbërëse e strukturave rajonale dhe globale të sigurisë, në veçanti të NATO-s, Bashkimit Evropian, OSBE-së dhe Organizatës së Kombeve të Bashkuara”, deklaroi Thaçi.

Sipas kryeministri Thaçi, Neni 126 që përfshinë themelimin e Forcave të Armatosura të Kosovës, Neni 127 sa i përket Këshillit të Sigurisë të Kosovës, Neni 129 Agjencia e Kosovës për Inteligjencë si dhe Nenin 131 që flet për Gjendjen e Jashtëzakonshme, si dhe Neni 77A sa i përket formimit të Komisionit Parlamentar për Forcat e Armatosura të Kosovës dhe Policinë e Kosovës.

“Forca e Armatosura të Kosovës, janë Forca Kombëtare, Ushtarake të Republikës së Kosovës dhe mund të dërgojnë Forca jashtë vendit në përputhje të plotë me përgjegjësitë e saj ndërkombëtare”, deklaroi kryeministri Hashim Thaçi.

Forca e Armatosura të Kosovës, siç tha tij, mbrojnë sovranitetin, integritetin territorial, qytetarët, pronën dhe interesat e Republikës së Kosovës si dhe kontribuojnë në ndërtimin dhe ruajtjen e stabilitetit rajonal dhe global.

Gjithashtu do të ketë një ndryshim të vogël në Nenin 2, Neni 73, Neni 84, Neni 94, Kapitulli 11 sa i përket sektorit të Mbrojtjes dhe Sigurisë, Neni 125 sa i përket Parimeve të Përgjithshme.

Në vazhdim të mbledhjes është shqyrtuar dhe miratuar Projektligji për Zgjedhjet e Përgjithshme në Republikën e Kosovës i cili është hartuar nga Komisioni për Legjislacion i Kuvendit të Kosovës, dhe nga Kuvendi i Kosovës është kërkuar që Qeveria e Republikës së Kosovës të paraqes mendimin lidhur me të.

Kryeministri Hashim Thaçi ka vlerësuar se ky projektligj do të sigurojë standarde edhe më të larta të zgjedhjeve në Republikën e Kosovës. Projektligji ka marr mbështetje unanime nga kabineti qeveritar.