Ministri Makolli uron mësuesit në diasporë

„Mësues, nxënës dhe prindër që punoni e jetoni në diasporë, jeni faktor shumë i rëndësishëm i krijimit të urave të bashkëpunimit me kombet e tjera“

Ministri i Diasporës, Ibrahim Makolli, ka uruar të gjithë mësimdhënësit me rastin e 7 Marsit – Ditës së Mësuesit.

„Sot, me nderim të veçantë, përkujtojmë  hapjen e shkollës së parë  shqipe në Korçë.I përkujtojmë të gjithë ata pishtarë të arsimit, që nga Pandeli Sotiri, Papa Kristo Negovani, Petro Nini Luarasi, Shtjefën Gjeçovi, Fazli Grajçevci e deri te mësuesit e ditëve tona  që kultivuan dhe mbrojtën me shumë mundime e sakrifica edukimin dhe arsimimin në gjuhën shqipe. Edhe sot mësimdhënësit tanë kanë një rol të pazëvendësueshëm në edukimin e brezave të rinj, që janë bazament i një të ardhmeje të ndritur të atdheut.“, thuhet në urimin e Makollit.

Ai ka thënë  se shkolla shqipe, përveç që ka qenë vatër e diturisë, ka qenë edhe bazë e nismave të mëdha historike në rrugën e emancipimit dhe të  krijimit të kombit modern shqiptar, por edhe të krijimit të shtetit shqiptar, sidomos të shtetit të  Kosovës.“

„Ju, të nderuar mësues, nxënës dhe prindër që punoni e jetoni në diasporë, jeni pjesë e rëndësishme jo vetëm e ruajtjes së identitetit gjuhësor, kulturor e kombëtar të fëmijëve tanë në mërgatë, po, përgjithësisht, e zhvillimit arsimor e kulturor të shqiptarëve, si faktor shumë i rëndësishëm i krijimit të urave të bashkëpunimit me kombet e tjera. Ju  jemi shumë mirënjohës për kontributin  tuaj.“, thuhet në urim

Ministria e Diasporës do të angazhohet për avancimin e pozitës së mësimit plotësues kudo në mërgatë, që nga Kanadaja e deri në Zelandën e Re, për avancimin e mësimdhënësve dhe institucionalizimin e mësimit plotësues kudo në diasporë.

„Në emrin tim dhe në emrin e Ministrisë së Diasporës, të gjithë mësimdhënësve, nxënësve dhe prindërve  ua urojmë këtë ditë të madhe të arsimit, duke besuar në arritje e suksese edhe më të mëdha në të ardhmen“, thuhet në urimin e Ministrit Makollit