Kosova lidh marrëdhënie diplomatike me Gabonin

Republika e Kosovës vendos marrëdhëniet diplomatike me Republikën e Gabonit. Marrëveshja u nënshkrua në Paris

Ambasadori i Republikës së Kosovës në Francë, Muhamedin Kullashi dhe ambasadori i Republikës së Gabonit në Francë, Germain Ngoyo Moussavou, kanë nënshkruar protokollin për vendosjen e marrëdhënieve diplomatike bilaterale ndërmjet Kosovës dhe  Gabonit.

Siç njofton Ministra kosovare e Punëve të Jashtme, ceremonia e nënshkrimit të protokollit për vendosjen e marrëdhënieve diplomatike, është zhvillua në Ambasadën e Kosovës në Paris.

“Të dy ambasadorët vlerësuan lartë vendosjen e marrëdhënieve diplomatike ndërmjet dy shteteve, duke e cilësuar si një hap të rëndësishëm drejt forcimit të bashkëpunimit bilateral ndërmjet dy vendeve në fusha të ndryshme, duke u fokusuar në fushën pmolitiko-diplomatike, ekonomike dhe kulturore”, thuhet në njoftim.

Ambasadorët Kullashi dhe Ngoyo Moussavou rikonfirmuan përkushtimin e Republikës së Kosovës dhe Republikës së Gabonit për promovimin dhe mbështetjen e parimeve universale si dhe të bashkëpunimit ndërkombëtar dhe paqes botërore.

“Pas ceremonisë së vendosjes se marrëdhënieve diplomatike, ambasadorët diskutuan ndërmarrjen e hapave konkret të mëtejmë, për të thelluar bashkëpunimin bilateral ndërmjet dy shteteve”, njofton MPJ.