Për një muaj 750 azilkërkues kosovarë

Të dhënat e fundit që vijnë nga BE-ja, tregojnë se vetëm në muajin janar, 750 kosovarë kanë kërkuar azil në shtetet e Bashkimit Evropian

Përfaqësuesit e institucioneve të Kosovës për çdo ditë po u bëjnë thirrje qytetarëve që mos të shkojnë në Evropë për të kërkuar azil, sepse vetë shtetet e BE-së kanë vendosur që mos të lëshojnë lejeqëndrim për kosovarët. Kjo thirrje megjithatë nuk po jep rezultat. Vetëm në muajin janar, 750 kosovarë kanë kërkuar azil në BE.

 

Edhe pse shumica e atyre që marrin botën në sy, janë të vetëdijshëm se mundësia për të fituar statusin e qëndrimit në ndonjë shtet të Evropës është minimale, ata prapë po ikin me shpresën se do ta gjejnë “tokën e premtuar”.

 

Të dhënat e fundit që vijnë nga BE-ja, tregojnë se vetëm në muajin janar 2014, janë 750 kosovarë që kanë kërkuar azil në shtetet e Bashkimit Evropian. Prej tyre gazeta “Zëri” raporton se 150 janë kosovarë që kanë kërkuar azil për të dytën apo të tretën herë, pasi që të njëjtëve u ishte refuzuar viteve të kaluara azili, ndërsa të tjerët për herë të parë.

 

Ndërkohë që shifrat finale të përgatitura nga BE-ja, për azilkërkuesit kosovarë gjatë gjithë vitit 2013 shënojnë mbi 21 mijë, vit ky që ka shënuar edhe rritjen më të madhe të azilkërkuesve, në vitet e fundit.

 

Numri i tyre në krahasim me vitin 2012 ishte 10 mijë më i lartë. Sidoqoftë, siç thotë një zyrtar i BE-së, numri i kosovarëve që ka lëshuar Kosovën për të jetuar në Evropë mund të jetë edhe më i madh.

 

“Për shkak se ka shumë prej tyre që fare nuk paraqiten azil, por përpiqen aq sa munden të jetojnë ilegalisht. Ndërsa numrin që ne e kemi është vetëm i llogaritur nga ata që kërkojnë azil”, tha ky zyrtar i BE-së.

 

Ndryshe, Hungaria, Franca, Gjermania, Belgjika, Zvicra, Suedia, Austria, Norvegjia, mbesin ndër vendet më të preferuara të azilkërkuesve kosovarë, ndërsa mosha e tyre sillet nga 18 deri në 35 vjeç. Nga 750 azilkërkuesit, prej tyre 70 kanë kërkuar azil në Belgjikë, 555 në Francë e Gjermani dhe 125 në Suedi.

 

Ndryshe edhe për kërkesat në shtetet tjera, vendimet kryesisht kanë qenë refuzuese për statusin e tyre. Prej 21 mijë kërkesave për azil në vitin 2013, prej tyre vetëm 380 kanë marrë përgjigje pozitive për leje qëndrimi, ndërsa mijëra të tjerë janë refuzuar.

 

Prej shteteve të BE-së, Franca ka kthyer më së shumti përgjigje pozitive, ajo ka kthyer 175 përgjigje pozitive; Gjermania ka kthyer 35 përgjigje pozitive; Austria 30 përgjigje pozitive; Suedia 35 përgjigje pozitive; Zvicra, ka kthyer 80 përgjigje pozitive; Norvegjia 5 përgjigje; kurse Hungaria që ka marrë më së shumti kërkesa për azil, nuk e ka kthyer as një përgjigje pozitive.

Numri i azilkërkuesve ndër vite

Viti 2010: 14.310 azilkërkues
Viti 2011: 9.790 azilkërkues
Viti 2012: 11.135 azilkërkues
Viti 2013: 21.965 azilkërkues
Janar 2014: 750 azilkërkues

---