Klopp, i mahnitur, befason me fjalët për Shaqirin

Foto: Twitter

Trajneri i Liverpoolit, Jurgen Klopp, ka insistuar se është me të vërtetë i lumtur që e ka Xherdan Shaqirin në klub dhe ka deklaruar se mesfushori nga Kosova është lojtar i rëndësishëm për të, edhe pse ka zëra për një largim të mundshëm të tij. 

Edicioni i parë i 27-vjeçarit në “Anfield” mbyllet të shtunën kur Liverpool do të  përballet me Tottenhamin në finalen e Ligës së Kampionëve në Madrid. 

Shaqiri nuk pritet të luajë në finale nga minuta e parë, por futbollisti kosovar shpreson se do të luajë. 

Gjashtë golat dhe pesë asistimet e tij në 30 paraqitje këtë edicion janë vlerësuar tejmase nga tifozët e Liverpoolit, të cilët nuk e duan largimin e gjilanasit. 

Klopp e ka cilësuar Shaqirin si ambasador të mrekullueshëm për vendin e tij. 

“Çfarë futbollisti i mrekullueshëm, çfarë ambasadori i mrekullueshëm për vendin e tij. Me të vërtetë jam i lumtur që e kam atë në skuadër”, vlerësoi trajneri gjerman. 

“Unë e di që njerëzit mendojnë se nuk kam luajtur me atë mjaftueshëm. Me gjasë, ai e mendon të njejtën”, vazhdoi Jurgen Klopp. 

“Por, ai ka qenë një futbollist i rëndësishëm për ne gjatë gjithë edicionit”, shtoi Jurgen Klopp.