Për mbajtjen e vizës B, nevojiten 3 vjet në të njëjtën martesë

Dy martesa me gra të ndryshme nuk janë bazë për mbajtjen e lejes së qëndrimit për të huajt, edhe kur koha e llogaritur bashkë është tri e më shumë vite e gjatë

Njerëzit me shtetësi të huaj pas shkurorëzimit me një shtetas/e zviceran/e mund ta ruajnë të drejtën e qëndrimit në Zvicër (vizën B) vetëm nëse kanë jetuar së paku tri vite me zviceranen/in e njëjtë. 

Sipas vendimit të Gjykatës Federale, vitet e kaluara me dy martesa të njëpasnjëshme me shtetasin zviceran nuk mund të akumulohen (të numërohen së bashku) për të plotësuar afatin e nevojshëm prej tri vitesh.

Këtë vendim Gjykata më e lartë e Zvicrës e ka marrë duke iu referuar dy rasteve të veçanta: të një kosovari dhe rastit të një bengalezi. Të dy ata kanë qenë të martuar me nga dy gra zvicerane njëra pas tjetrës në një periudhë që, e marrë se bashku ka zgjatur tre vjet te secili.  

Trupi gjykues i Gjykatës Federale prej pesë gjyqtarëve, me shumicë votash ka vendosur që dy martesat me gra të ndryshme nuk mund të jenë bazë për mbajtjen e lejes së qëndrimit për të huajt, edhe kur koha e llogaritur bashkë është tri e më shumë vite e gjatë.

Edhe pse të dy personat e përmendur kanë pasur dëshmi të integrimit të suksesshëm në shoqërinë e këtushme, Zyra për Migracion e Kantonit të Cyrihut atyre nuk kishte pranuar t`ua vazhdonte lejen e qëndrimit psi nuk i kishin plotësuar 3 vjet martesë me të njëjtën grua.

Kjo kishte qenë arsyeja që ata kishin bërë ankesë në shkallën më të lartë të gjyqësisë zvicerane.

Trupi gjykues i Gjykatës Federale prej pesë gjyqtarëve, me shumicë votash ka vendosur që dy martesat me gra të ndryshme nuk mund të jenë bazë për mbajtjen e lejes së qëndrimit për të huajt, edhe kur koha e llogaritur bashkë është tri e më shumë vite e gjatë.

Njëri nga gjyqtarët kishte mbrojtur qëndrimin se dy të ankuarve u duhej dhënë e drejta e vazhdimit të lejes B, pasi që ata e kishin plotësuar sipas tij kushtin bazë, tri vjet në martesë, edhe pse me dy gra të ndryshme. Sipas tij, në këtë pikë ligji përkatës ka një boshllëk nga i cili nuk bën të pësojnë palët.