I akuzuari për terrorizëm, Çëndrim R., nuk ka shtetësi zvicerane

Departamenti i Jashtëm i Zvicrës ka konfirmuar sot se i akuzuari për pjesëmarrje në atentatin me tre të vrarë në Turqi, nuk ka shtetësi zvicerane

Njëri nga tre xhihadistët e akuzuar për sulmin mbi policët turq, shqiptari Çëndrim R., rezulton se nuk ka shtetësi zvicerane, siç ishte spekuluar nga mediet turke.

Ç. R. ndodhet në burg, në Turqi, nga e premtja e javës së kaluar. Akuza e ngarkon atë se së bashku me një gjerman dhe një shtetas të Maqedonisë (shqiptar), në një atentat me motive xhihadiste ka vrarë tre policë persona në Anadollin e Jugut. Në mesin e të vrarëve ishte një ushtar dhe një polic.

Departamenti i Jashtëm i Zvicrës ka konfirmuar sot për emdiet zvicerane se i akuzuari për pjesëmarrje në atentat nuk ka shtetësi zvicerane. Por, ai nuk ka sqaruar se çfarë shtetësie ka Çëndrim R

Duke ndjekur burimet e veta portali 20minuten.ch ka konstatuar se i akuzuari ka jetuar në Zvicër, në kantonin Aargau por nuk ka pasur shtetësi zvicerane. Ai kishte qenë i dënuar në Zvicër, ku kishte mbajtur afër tre vjet burg në Lenzburg për plaçkitje të armatosur, ka thënë për portalin një i njohur i tij.

Pas vuajtjes së dënimit R. është dëbuar në Maqedoni, ndërkohë që familja e tij ka mbetur të jetojë në Zvicër. Ka rreth gjashtë muaj që ai ka humbur çdo gjurmë, gjegjësisht ka ndërprerë kontaktet me familjen e tij. Mbetet e paqartë se ku i ka fillet radikalizmi i Çëndrimit, në burgun zviceran apo në Maqedoni.

Sidoqoftë, të njohurit e tij në Zvicër nuk e kanë dëgjuar atë kurrë duke folur për luftën e shenjtë. Po ashtu me pamjen e rregullt dhe flokët e shkurtra ai kurrë nuk kishte rënë në sy për orientimin e tij ekstrem islamist. Megjithatë, një shok i tij i shkollës ka thënë se ai binte në sy për sjelljet e tij agresive.

Në vazhdim portali 20minuten.ch citon një artikull të albinfo.ch mbështet teorinë se radikalizmi i tij duhet të ketë ndodhur vetëm pas kthimit në Maqedoni.  

“Portali për shqiptarët e Zvicrës ka publikuar informacione lidhur me indoktrinimin xhihadist të shqiptarëve për luftën civile në Siri. Në këtë kuptim, armatës së lirë siriane mund t`i jenë bashkuar deri në 800 vullnetarë nga Shqipëria, Maqedonia dhe Kosova. Pas stërvitjeve ushtarake në Turqi, vullnetarët në fjalë janë dërguar në vendluftime në Siri.