Kosovari merr peng stjuardesën gjermane

Policia ka vendosur kontakt me rrëmbyesin përmes një përkthyesi dhe pastaj e ka arrestuar atë, me ç`rast ai nuk ka ofruar fare rezistencë

Një kosovar me qëndrim ilegal në Gjermani ka marrë sot peng një stjuardesë gjatë fluturimit të aeroplanit nga Munihu në Budapest. Stjuardesa 50 vjeçare me këtë rast ka pësuar lëndime të lehta.

Siç bën me dije policia, kosovari 28 vjeçar pak pas nisjes së aeroplanit pasie ka kërcënuar stjuardesën me një brisk rroje dhe e ka pushtuar atë. Me këtë rast piloti e kthen aeroplanin nga ishte nisur, në Munih. Të gjithë 78 udhëtarët e lëshuan aeroplanin pa problem ndërsa brenda mbeti vetëm kosovari me stjuardesën. Ndërkohë policia ka vendosur kontakt me rrëmbyesin përmes një përkthyesi dhe pastaj e ka arrestuar atë, me ç`rast ai nuk ka ofruar fare rezistencë.

Zëdhënësi i policisë nuk ka mundur të sqarojë se si ka mundur sulmuesi të hyjë në aeroplan me briskun  rrojës. Kosovari është marrë në polici për hetime. I njëjti zëdhënës shton po ashtu se nuk ka pasur sulm ndaj aeroplanit siç ka mundur të përhapet nga ndonjë medium.

28 vjeçari ka qenë më parë si azilkërkues në Hungari, prej nga ka hyrë ilegalisht në Gjermani. Pasi është kapur ai është mbajtur një muaj në burgu për dëbim në Passau dhe pastaj është dërguar nga policia në aeroport për dëbim.

Pengmarrësi me këtë akt donte të kundërshtonte vendimin për largimin e tij nga Gjermania pasi i është refuzuar kërkesa për azil. 

Një njësit komandosh speciale ka qëndruar në gatishmëri por nuk ka pasur nevojë të ndërhyjë, shkruan Berlinerkurier.de. Gjithsej dy stjuardesa kanë pësuar lëndime të lehta. Njëra ka plagë nga prerja në njërën dorë, e dyta gërvishtje. Ndërsa një e tretë ka pësuar vetëm tronditje.