Berisha kërkon kualifikimin në Evropian

Etrit Berisha beson se një fitore ndaj Islandës do të rikthente entuziazmin te kuqezinjtë

Portieri i kombëtares shqiptare, Etrit Berisha nuk është dëshpëruar dhe kërkon kualifikimin në Kampionatin Evropian, edhe ose e pranon se do të jetë shumë vështirë.

“Ne duhet të fokusohemi në përgatitjen e ndeshjeve dhe të mundohemi të marrim një rezultat pozitiv me Islandën. Ndoshta na duhet një shkëndijë e vogël, që të ëndërrojmë më shumë për një kualifikim të mundshëm në Evropian”, është shprehur Berisha.

Tashmë kuqezinjtë drejtohen nga Edy Reja, i cili zëvendësoi Christian Panuccin.

“Përvoja e tij është jashtëzakonisht e madhe dhe kjo na duhet shumë neve, pasi kemi shumë lojtarë të rinj në grup, që kanë nevojë për përvojë. Reja e ka këtë përvojë dhe mundohet ta përcjellë te grupi, duke kërkuar të jemi kompaktë dhe të mos pësojmë”, theksoi portieri nga Prishtina, përcjell albinfo.ch.

Shqipëria të shtunën përballet me Islandën në udhëtim.

“Fizikisht Islanda është shumë lart, por duhet të reagojmë mirë ndaj tyre, për të tentuar një rezultat të mirë”, shtoi tutje Berisha.

Ai në fund foli edhe për suksesin me Atalantën dhe të ardhmen e tij.

“Më i gëzuar jam për arritjet e ekipit, pasi kemi qenë të gjithë pjesë e suksesit. Në muajt e fundit ka ndodhur edhe ndryshimi, ndaj tani duhet t’i shikoj me shumë kujdes gjërat dhe pas disa javëve duhet të marr një vendim për të ardhmen. Ende tani është shumë herët dhe jam i përqendruar te Kombëtarja, pasi ka kohë për afatin kalimtar”, deklaroi Berisha.

---