Dhjetë inspektorë ndërtimi në pranga

Prokuroria speciale thotë se për dhjetë zyrtarët e arrestuar nga Komuna e Prishtinës, ekziston dyshimi i arsyeshëm se kanë kryer veprën penale të keqpërdorimit

Autoritetet e rendit në Prishtinë kanë arrestuar të enjten në mëngjes dhjetë inspektorë nga Sektori i Ndërtimit i Drejtorisë së Inspektoratit të Komunës së Prishtinës, përfshirë këtu shefin e sektorit, një zyrtar për ekzekutim dhe tetë inspektorë për ndërtim.

Në mesin e të arrestuarve është edhe pronarin e një kompanie private të ndërtimit. Arrestimi është bërë me urdhër të prokurorit vendor nga Prokuroria Speciale e Republikës së Kosovës, thuhet në njoftim.

Në një komunikatë për opinion, prokuroria thotë se për dhjetë zyrtarët e arrestuar nga Komuna e Prishtinës, ekziston dyshimi i arsyeshëm se kanë kryer veprën penale të keqpërdorimit të pozitës zyrtar.

Ndërkaq, për të arrestuarin e njëmbëdhjetë, (pronari i një kompanie private), ekziston dyshimi i arsyeshëm se “ka kryer veprën penale Falsifikim i dokumenteve nga neni 398, paragrafi 2 i Kodit Penal të Republikës së Kosovës”.

Prokurori i rastit, për të pandehurit, ka urdhëruar ndalimin policor në kohëzgjatje prej 48 orësh. “Arrestimi është rezultat i hetimit paraprak, që është zhvilluar nga shtatori i vitit 2013, lidhur me ndërtimin e objekteve pa leje ndërtimore, në Komunën e Prishtinës”, thuhet në komunikatë.

Ndryshe, në kryeqytetin e Kosovës, Prishtinë që nga paslufta janë ndërtuar mijëra objekte, shumica prej tyre pa leje ndërtimi. Prandaj sektori i ndërtimeve është konsideruar më i korruptuari në rajon, sepse për ndërtimin e një shtëpi apo ndërtese është dashtë të korruptohen inspektorët e ndërtimit.