Zgjedhjet që u mbajtën më 30 mars, për shqiptarët e Glattbruggut sollën një frymë dhe situatë të re në këtë qytezë. Ibrahim Zahiri i dha një kahe tjetër jetës së shqiptarëve të këtushëm, duke u zgjedhur këshilltar komunal në Glattbrugg. Ai ka arritur kështu që të jetë shqiptari i parë që zgjidhet në këtë pozitë.

 

Zahiri shpjegon rrugën që ka ndjekur për të kandiduar për këto zgjedhje. Ai tregon se para se të kandidohej nga partia e tij GV (Gemeindeverein), së pari e ka marrë mendimin e të afërmve të tij.

“I kam pyetur dhe kam dashur të marr këshillë së pari prej familjes, të afërmve dhe shoqërisë. U kam treguar se më është ofruar kjo mundësi dhe se më duhet mendimi i tyre. Këshillë kam kërkuar jo vetëm nga ata që kanë të drejtë vote por edhe nga ata që s`kanë. Pas miratimit prej tyre jam kandiduar, por askujt nuk i kam thënë që të më votojë mua. Ia kam lënë secilin që të vendosë vetë sepse në Glattbrugg mua më njohin” thotë Ibrahim Zahiri.

Atë e kanë votuar jo vetëm shqiptarët që kanë pasaportë zvicerane por edhe zviceranët dhe të tjerët, madje ai ka pasur një mbështetje jashtëzakonisht të madhe nga zviceranët.
Zahiri nuk e quan veten politikan, por…”Unë nuk mund ta quaj veten politikan, më shumë identifikohem si aktivist, sepse ne nuk bëjmë politikë por merremi me problemet e qytetarëve dhe angazhohemi për një jetë sa më të mirë” thotë Zahiri.

Zahiri në njëfarë mënyre ka qenë i sigurt që do të fitojë dhe është i kënaqur me rezultatin e zgjedhjeve.

 

“Kam marrë vota më shumë se të mjaftueshme dhe jam i kënaqur me këtë. Kam qenë i sigurt në fitore, sepse unë nuk kam qenë i përqendruar vetëm te një grupacion apo si të themi, nuk kam pritur vota vetëm nga shqiptarët por edhe nga zviceranët dhe të tjerët. Unë nuk mund ta di dhe shoh tash se kush më ka votuar, prandaj nuk kam të drejtë të them se i përfaqësoj vetëm shqiptarët, unë i përfaqësoj të gjithë votuesit që ma kanë dhënë votën. Ne shqiptarë jemi, dhe kjo nënkupton automatikisht edhe përfaqësim i shqiptarëve.”

Ai shpjegon më tutje se pasi që fitoi si asambleist komunal, e kanë thirrur shumë miq në telefon dhe ia kanë uruar fitoren, por kishte edhe të atillë që e kanë pyetur se sa do ta ketë pagën si asambleist.

 

“As vet nuk e di, për Zotin nuk e di, dhe as që jam interesuar se si dhe sa fiton një asambleist. Sinqerisht as që më ka shkuar mendja për këtë, sepse nuk kam hyrë këtu që të fitoj dhe të bëhem i pasur por kam hyrë sepse gjithmonë kam qenë i interesuar që të kontribuoj për vendin aty ku jetoj, dhe këtë shpresoj se e kam dëshmuar edhe në aktivitete tjera që kam bërë” thotë Zahiri

Për fund Ibrahim Zahiri, nuk harron që për të gjithë këtë mund dhe sakrificë ta falënderojë personin e zemrës.

 

“Dua ta falënderoj gruan time Ylberen, e cila më ka dhënë mbështetje që ta marr këtë rrugë sepse kjo kërkon edhe kohën e vet, dhe e falënderoj që m’i ka marrë obligimet në njëfarë mënyre që ta zëvendësoj mungesën time para fëmijëve tanë, gjatë kohës që unë do të jem me këtë angazhim të ri. Gjithashtu i falënderoj familjen time në përgjithësi për mbështetjen që ma kanë dhënë, si dhe të gjithë miqtë, dashamirët dhe të gjithë votuesit për besimin që ma kanë dhënë” thotë Zahiri.

Ibrahim Zahiri në fakt gjithmonë është marrë me aktivitete të ndryshme, duke u angazhuar në fusha të ndryshme kulturore dhe sociale. Për pesë vite radhazi ai ka qenë kryetar i këshillit të prindërve në shkollën më të madhe të kantonit të Cyrihut, kurse tash është kryetar i këshillit të prindërve në një shkollë tjetër (Oberstufe). Përveç këtij aktiviteti, Zahiri është adhurues i madh i kafshëve dhe për këtë ai në Regensdorf është kryetar i shoqatës për kafshët e vogla.

 

Gjithashtu është  ai është bashkëthemelues dhe bashkëiniciator për themelimin e shoqatës Glatt-Alb. Aktualisht Zahiri është arkëtar i kësaj shoqate, e cila angazhohet në fushën e integrimit të shqiptarëve në Zvicër.