Shpëtimtari i çekut misterioz, një shqiptar nga Kosova

“Vetëm kur i kam folur diçka në gjuhën polake e kam parë reagimin në sytë e tij dhe e kam kuptuar se po i kupton gjuhët sllave", thotë Sami Sadiku

I huaji misterioz i gjetur para sa muajsh në Oslo, i cili nuk kujtonte asgjë për veten, është shpëtuar nga një shqiptar nga Kosova që jeton në Norvegji, raportojnë sot mediat çeke.

Fillimisht i riu është prezantuar si John Smith.

Mediat për shpëtimtarin, Sami Sadiku i cili jeton që 12 vjet në Oslo e kanë ditur vetëm tash, pasi që deri javën e kaluar, kur fotografia e çekut 36 vjeçar u paraqit në media, besohej si ishte i vdekur.

“E kam gjetur të shtrirë në trotuar para një auto-larjeje, kurse kishte veshur pak rroba, e jo siç duhet veshur dimrit në Oslo”, ka thënë Sadiku për të përditshmen norvegjeze, Verdens Gang.

Sadikun e ndihmoj një kalimtar rasti dhe i punësuari në autolarje të cilin edhe e quan të lënduarin dhe të dezorientuarin misterioz i cili nuk ishte në gjendje as të flas, por ka reaguar kur i është folur në gjuhë sllave.

“Vetëm kur i kam folur diçka në gjuhën polake e kam parë reagimin në sytë e tij dhe e kam kuptuar se po i kupton gjuhët sllave. Fytyrën e kishte të mavijosur, sigurisht se dikush e kishte rrahur. Po ashtu në duar kishte lëndime dhe gjakosje. Sikur të ishte i lidhur”, ka thënë Sadiku, transmeton indeksonline.net.

Vetëm kur policia norvegjeze këtyre ditëve e publikoj fotografinë e të huajt misterioz i cili vuan nga amnezia (harresa), Sadiku e kuptoj se ai ishte burri që e shpëtoj dhe për të cilin në dhjetor u mor në pyetje nga policia.

Që bëhet fjalë për çekun 36 vjeçar Mihal P. nga Moravska i cili tri vitet e fundit kishte jetuar në Pragë e kanë konfirmuar analizat e ADN-së të prindërve të tyre, ka njoftuar policia çeke.

Prindërit dhe miqtë e kanë njohur këtë javë kur fotografia e tij u paraqit në media e Çekisë, mirëpo i huaji nga Oslo nuk kujton asgjë kur i shikon fotot e tij.