Reshje të mëdha shiu dhe vërshime në Kosovë

Pas muajve të tërë me thatësi, ditëve të fundit shirat në shumicën e regjioneve në Kosovë nuk kanë të ndalur

Pas reshjeve të fundit, disa fshatra të Komunës së Prishtinës janë bllokuar nga vërshimi i ujërave. Për këtë arsye, Kryetari i Prishtinës, Shpend Ahmeti ka paralajmëruar se sot do të mbajë një mbledhje me Komitetin e Krizave.

“Pas shumë intervenimeve sot kryetari Ahmeti ka thërriur mbledhjen e Komitetit të Krizave në ora 17:00 ku bëjnë pjesë të gjitha institucionet relevante. Aty të gjithë do të raportojnë për situatën e krijuar 24 orët e fundit e pastaj do të merren vendimet për hapat e mëtutjesh”, ka njoftuar Komuna e Prishtinës.

Ndërkohë, gjatë ditës, Shpend Ahmeti ka vizituar disa fshatra për të parë gjendjen në banorëve atje, shkruan gazetaexpress.com.

“Gjendje e rëndë në disa fshatra nga vërshimet. Nga mëngjesi jemi në terren me Inspekcionin, Sherbimet Publike, Infrastrukturen, Zjarrfikesat. Sapo biseduam edhe me FSK per ndihmen e nevojshme. Po mundohemi te sanojme pjese te ndryshme. Per cdo gje do te informoheni me kohe”, ka njoftuar Ahmeti.

Edhe në qytet gjendja është keqësuar për shkak se uji nuk po qarkullon nëpër kanalizimet, të cilët janë të bllokuar.