Gjigantët e futbollit turk e duan gjigantin e Kosovës

EPA/VASSIL DONEV

Sulmuesi i Kosovës, Vedad Muriqi është në qendër të vëmendjes pas paraqitjeve të jashtëzakonshme me Rizesportin në Superligën turke.

Ai gjithashtu ka shkëlqyer edhe me Kosovën në Ligën e Kombeve apo edhe në ndeshjen e fundit me Bullgarinë, përcjell albinfo.ch.

Presidenti i Rizesporit, Hasan Kartal ka konfirmuar se në adresë të klubit turk kanë arritur dy oferta zyrtare, asnjë prej tyre në nivelin minimal të kërkuar.

“Veç Fenerbahçes dhe Galatasarayt, nuk ka arritur ndonjë ofertë tjetër për Muriqin”, ka thënë kreu i klubit nga Superliga turke për TRT Sports, raportojnë mediat shqiptare.

“Oferta e Galatasaray është 3 milionë euro, ndërsa oferta e Fenerbahçes nuk ka ndryshuar ende 2,3 milionë euro. Për të dhënë një lojtar si Vedati nuk është e mundur. Për momentin gjërat janë kështu. Kur t’i skadojë kontrata, ai do të jetë i lirë të shkojë”, përfundoi Kartal.

Rizespori ndërkohë i kërkon 10 milionë euro për futbollistin e ekipit të Kosovës ndërsa për të ka oferta edhe nga Tuluz e Real Betis.