Zyrtarizohet ndeshja mes Feronikelit dhe AC Milan

Skuadra e madhe italiane AC Milan më 10 gusht do të zhvillojë një ndeshje miqësore me kampionin e Kosovës në futboll, Ferronikelin.
Lajmin e ka bërë të ditur skuadra kosovare nëpërmjet një njoftimi për medie.
“Sot është arritur marrëveshja për supersfidën që do të zhvillohet mes Feronikelit dhe skuadrës legjendare të Serie A, AC Milan. Pas negociatave që kanë filluar qe një kohë, sot është finalizuar marrëveshja për këtë miqësore të madhe. Skuadra e AC Milan do të vijë për herë të parë në Kosovë për të zhvilluar miqësoren me kampionët e Kosovës, Feronikelin”, thuhet në njoftim, transmeton albinfo.ch.
Aty theksohet se presidenti i Feronikelit, Naser Ramaj, nënshkroi marrëveshjen me menaxherin Agron Selimi, i cili ishte ndërmjetësuesi i marrëveshjes në këtë rast.
Detajet për fillimin e lojës dhe për bileta nuk janë caktuar ende, por që do të komunikohen me kohë.
Ky njoftim ka gëzuar tifozët e skuadrës italiane në Kosovë që janë në numër të madh.