I hiqet masa e kujdestarisë kosovarit për vrasjen e badigardit

Dënimi prej 16 vjet e 3 muaj burg për vrasje me paramendim ka mbetur i njëjti por atij i është hequr masa e kujdestarisë

Shqiptari nga Kosova, i dënuar për vrasjen e një bodigardi të diskotekës në Grenchen të Kantonit Solothurn pas rigjykimit të lëndës në Gjykatën e Lartë ka fituar një zbutje të vogël. Dënimi prej 16 vjet e 3 muaj burg për vrasje me paramendim ka mbetur i njëjti por atij i është hequr masa e kujdestarisë.

Në atakimin e vendimit gjyqësor, kosovari sot 25 vjeçar kishte synuar të arrinte pikërisht heqjen e masës së kujdestarisë. Ai gjatë procesit gjyqësor është ankuar se kishte brejtje të ndërgjegjes, jetonte në ankth etj. Po ashtu kishte pohuar se “i kam merituar 16 vjetët e burgut të shqiptuar. Ajo çfarë kam bërë unë është e sëmurë”. Por, masa e kujdestarisë për të ishte e tepërt sepse ai kështu nuk do të kishte fare perspektivë jetësore, shkruan azonline.ch.

“Unë do të doja që kurdoherë të kthehesha në vendin tim, në shtëpinë e prindërve dhe të krijoj familje”, ka thënë ai. Masa e kujdestarisë ndërkaq do ta ngujonte atë për gjithë jetën.

Gjykata e lartë e Solothurnit pjesërisht ia ka plotësuar dëshirën atij. Duke qenë se gjatë qëndrimit të deritashëm në burg (tri vjet) ai ka pasur sjellje të mirë ajo i ka hequr kujdestarinë dhe i ka caktuar atij një trajtim terapeutik stacionar. Kjo është arsyetuar nga trupi gjykues edhe me shkallën e caktuar të pendesës që ka treguar i dënuari.

Kosovari atëbotë 21 vjeçar kishte vrarë me therje thike badigardin gjerman të diskotekës Luxor të qytetit Grenchen.