Filloi bashkëpunimi mjekësor Shqipëri-Kosovë

Operohen pacientët e parë nga bashkëpunimi i kardiokirurgëve nga Shqipëria dhe atyre nga Kosova

Mjekët specializantë nga Shqipëria dhe nga Kosova janë bashkuar të premten në Prishtinë për t’i kryer disa operacione në kardiake. Dy operacionet e para në zemër, shënuan edhe bashkëpunimin e parë të mjekëve shqiptarë, pas marrëveshjes dypalëshe ndërmjet Qeverisë së Kosovës dhe asaj të Shqipërisë në fushën e Shëndetësisë.

Ky bashkëpunim filloi me dy ekipe mjekësh, njëri që erdhi nga Kardiokirurgjia e Qendrës Spitalore Universitare “Nënë Tereza” të Tiranës dhe mjekët nikoqir nga Qendra Klinike Universitare e Kosovës në Prishtinë.

Ministri i Shëndetësisë i Republikës së Kosovës, Ferid Agani, me këtë rast tha se ky është fillim i konkretizimit të bashkëpunimit ndërmjet shëndetësisë së Republikës së Kosovës dhe asaj të Shqipërisë.

“Ky bashkëpunim vjen pas  takimit të dy qeverive në Prizren dhe pas vizitës së Ministrit së Shëndetësisë së Shqipërisë, Ilir Beqja, ky është hap në drejtim të ndërtimit  të shërbimit kombëtarë të kardiokirurgjisë” u shpreh Agani.

Sipas tij, 2 pacientët që janë operuar, nuk kanë pasur nevojë të trajtohen në institucione tjera private, apo jashtë vendi, por me sukses të plotë janë operuar në Prishtinë.

“Është themel i bashkëpunimit afatgjatë, i lidhur mes dy ministrive, dy shërbimeve,  do jetë bashkëpunim sistematik, do ketë programe të rregullta operative në QKUK, në shërbimin kardiokirurgjisë tonë çdo dy javë me një program të caktuar, do të nënkuptojë edhe trajnimin e kuadrit tonë”,  tha Agani.

Në anën tjetër, Qemajl Minxhozi, ambasador i Republikës së Kosovës në Shqipëri, tha se dy operacionet e realizuara janë vetëm nisma e bashkëpunimit.

“Janë dy intervenime simbolike që hapin trasenë e një rrugëtimi që do të nis nga shtatori i këtij viti, që Shqipëria me ekspertizë, me mjekë specialistë, me bashkëpunim me mjekët e Kosovës të pasojë me nisma tjera mes dy dikastereve”, u shpreh Minxhozi. Sipas tij, janë 6 institucione nga Shqipëria që pritet të bashkëpunojnë me ato nga Kosova.

Prof. Dr. Ali Rifatllari, kardiokirurg dhe rektor i Universitetit të Mjekësisë në Tiranë, tha se është ndërtuar udha të bashkëpunimit, por do të punohet akoma në bashkëpunim.

“Ndjeva kënaqësi të veçantë, po realizoja një ëndërr që kisha dikur, edhe në Kosovë të zhvillohet kardiokirurgjia, gjeta kushte të mira të sallave operative dhe atyre të reanimacionit, salla të nivelit evropian. Ky është mesazh që kemi një qendër të rikonstruktuar mirë të nivelit evropian, jo vetëm mjekët shqiptarë, por edhe i huaj do të kishte nderë të punonte”, theksoi Rifatllari