Gati marrëveshja për Kartonin e Gjelbër

Përfaqësuesit e Kosovës dhe ata të BE-së vlerësuan se lënia e Kosovës jashtë Kartonit të Gjelbër është një anomali e cila duhet të zgjidhet sa më shpejt

Negociatat Kosovë-BE për Kartonin e Gjelbër duket se kanë arritur në finale. Sipas një njoftimi lëshuar nga autoritetet kosovare, negociatat që po zhvillohen në Bruksel ndërmjet përfaqësuesve të Bashkimit Evropian dhe Këshillin e Byrove për çështjen e Sigurimeve të Automjeteve në Kosovës, janë në prag të marrëveshjes.

Përveç me BE-në, delegacionin kosovar ka zhvilluar negociata edhe me përfaqësuesit e Beogradit, me cilët gjithashtu janë pajtuar se duhet të bëhet një memorandum i ri për uljen e taksave kufitare.

“Ishte vlerësim i përbashkët që çmimet aktuale dhe vështirësitë në kalimet kufitare janë pengesa të panevojshme për qytetarët dhe si rrjedhojë duhet të vazhdohet me diskutimet dhe dialogun për arritjen e Memorandumit të Mirëkuptimit në mes të dy vendeve, Kosovës dhe Serbisë”, thuhet në njoftim.

Delegacioni i Kosovës u takua me sekretaren e përgjithshme të Këshillit të Byrove, Greet Flore me të cilin diskutuan për rolin e Këshillit të Byrove si garantues të Memorandumit të Mirëkuptimit në mes të Serbisë dhe Kosovës për çështje të sigurimeve kufitare të automjeteve.

Në këtë takim, siç thuhet, u qartësuan disa pika të rëndësishme për perspektivën e anëtarësimit në Këshillin e Byrove siç janë: Stabiliteti i Byrosë Kosovare të Sigurimeve, Kapacitetet e Byrosë Kosovare të Sigurimeve (BKS) për trajtimin dhe shpagimin e dëmeve; Aftësitë, kapacitetet dhe përgatitjet e BKS dhe industrisë së sigurimeve, etj.

“Ishte vlerësim i përbashkët se lënia e Kosovës jashtë mbulueshmërisë me karton të gjelbër është një anomali dhe si e tillë duhet të zgjidhen modalitetet për dalje nga kjo situatë”, thuhet në njoftimin e lëshuar nga institucionet kosovare.

Delegacioni i Kosovës ka paraqitur disa metoda për mundësitë e daljes nga kjo gjendje duke u bazuar në rregullativën e Këshillit të Byrove.

Takimet të tilla siç thuhet, do të vazhdohen edhe në ditët në vazhdim deri në gjetjen e një zgjidhje evropiane të këtyre problemeve të akumuluara.

Delegacioni i Kosovës, përveç udhëheqëses së dialogut, Edita Tahiri, kishte në përbërje edhe Rrahim Pacollin i emëruar i Qeverisë së Kosovës për udhëheqje të Grupit Teknik për çështje të Sigurimeve kufitare dhe dialog me Këshillin e Byrosë së Kartonit të Gjelbër, Qemajl Marmullakaj koordinator për çështje të sigurimeve kufitare dhe Gazmir Raci, këshilltar politik i zëvendëskryeministres Edita Tahiri.