Kosova, marrëveshje me Qendrën George C. Marshall

Akademia Diplomatike e Kosovës dhe Qendra George C. Marshall kanë nënshkruar marrëveshje bashkëpunimi. Memorandumi u nënshkrua nga ministri Hoxhaj dhe gjenerali Dayton

Përfaqësuesit e Qendrës Evropiane për Studime të Sigurisë, George C. Marshall kanë nënshkruar të enjten një marrëveshje bashkëpunimi me Akademinë Diplomatike të Kosovës, me të cilën mbështesin diplomacinë kosovare në disa fusha. Marrëveshja është nënshkruar nga ministri i Jashtme, Enver Hoxhaj dhe gjenerali Keith W. Dayton.

Me këtë rast, ministri Hoxhaj e ka vlerësuar të rëndësishëm nënshkrimin e marrëveshjes e cila ka për qëllim ofrimin e ndihmës në fushën e ndërtimit të kapaciteteve njerëzore dhe fuqizimit të diplomacisë kosovare. Ai tha se është një nder i veçantë që nënshkruhet një memorandum të bashkëpunimit me Marshall Center.

“Ne kemi shumë nevojë që të kemi bashkëpunim në fusha të ndryshme të jetës dhe Akademia jonë Diplomatike është institucion i ri dhe padyshim që në rrafshin e trajnimeve, vizitave, hulumtimeve ky memorandum i bashkëpunimit është një kornizë e cila në planin afatshkurtër dhe afatgjatë ia mundëson MPJ-së, Akademisë Diplomatike dhe shtetit të Kosovës që të rris kapacitetet e tij në shërbimin e jashtëm”, tha Hoxhaj.

Nga ana tjetër, Lt. Gen Keith W. Dayton drejtor i Qendrës Evropiane për Studime të Sigurisë, George C. Marshall, ka shprehur gatishmërinë për të ndihmuar edhe më tej shtetin kosovar duke kujtuar se Republika e Kosovës ka një rëndësi të veçantë për të.

“Kosova ka një pozitë të rëndësishme në zemrën time sepse kam qenë këtu edhe në ditët më të vështira, kam qenë këtu gjatë luftës së saj dhe përtej. Dhe po kthehem këtu për t’u ndjerë optimist dhe për të mbushur shpresat tuaja dhe për mundësitë që kemi ne në Qendrën Marshall në Amerikë dhe Gjermani për të ndihmuar për të ecur drejtë Evropës”, ka thënë Dayton.

Ai po ashtu ka shtuar se kjo Qendër është shumë e interesuar që të krijoj raporte me Akademinë Diplomatike, sepse siç ka thënë ai, Kosova ka një të ardhme të ndritshme”.  Dayton ka treguar se pritje të njëjta për shtetin kosovar ka edhe Republika Federale e Gjermanisë e cila gjithashtu siç ka thënë ai, pret që Kosova të jetë vend i suksesshëm.

“E di se po flas edhe në emër të Gjermanisë dhe ata e dinin që po vija këtu dhe po ua përcjellë pritjet e tyre të larta se ky vend do të jetë i suksesshëm dhe e dimë që do të jetë i suksesshëm dhe ne jemi të gatshëm që të ndihmojmë diplomatët tuaj që të zhvillojnë procese diplomatike ndërkombëtare”, ka deklaruar Dayton.

Marrëveshja e bashkëpunimit e nënshkruar të enjten është vazhdimësi e marrëveshjeve që Akademia Diplomatike e Kosovës po i realizon me institucione të rëndësishme ndërkombëtare.