Shpërthim i fuqishëm në KEK, flitet për së paku 3 të vdekur

Nga ana tjetër, në QKUK raportojnë se deri më tash atje janë sjellë 13 të lënduar dhe nuk dinë për persona të vdekur

Foto ilustrim

Një shpërthim i rëndë ka ndodhur sot në orët e paradites në Korporatën Energjetike të Kosovës. Ndonëse nuk ka të dhëna zyrtare, thuhet se së paku tre persona kanë humbur jetën nga ky shpërthim. Autoritetet thonë se pritet edhe një shpërthim tjetër i radhës.

Nga ana tjetër, në QKUK raportojnë se deri më tash atje janë sjellë 13 të lënduar dhe nuk dinë për të vdekur.

Zëdhënësi i Policisë së Kosovës, Baki Kelani ka konfirmuar se ka ndodhur një shpërthim në Obiliq, njofton telegrafi.com

Shpërthimi është ndier edhe në Fushë Kosovë. Shtëpitë rreth zonës kanë pësuar dëmtime.

Drejtori i Shërbimeve në KEK, Endmond Nulleshi, ka konfirmuar për Telegrafin se ka ndodhur një aksident në formë shpërthimi në repartin e elektrolizës në Termocentralin Kosova A. Sipas tij, ende nuk ka të konfirmuar për viktima deri sa zjarrfikësit dhe ndihma e shpejtë janë në vend të ngjarjes.

Si reagim i parë ndaj kësaj fatkeqësie, kryeministri i vendit, Hashim Thaçi ka pezulluar fushatën zgjedhore për zgjedhjet që mbahen të dielën. Njësoj kanë deklaruar pezullimin e fushatës edhe liderë të partive të tjera të vendit.