Shqipëria do të hapë ambasadë në Australi

Deri më tash, mbulimi i marrëdhënieve diplomatike të Republikës të Shqipërisë me Australinë dhe me disa prej vendeve të Azisë dhe Paqësorit është mbuluar krejtësisht nga Ambasada e Shqipërisë në Pekin.

Në Kanaberra të Australisë pritet të hapet një ambasadë e Shqipërisë, përcjell albinfo.ch.

Lajmin e ka bërë të ditur ministri i Jashtëm i Shqipërisë, Gent Cakaj, përmes një shkrimi në Facebook. Këtë vendim të Qeverisë së Shqipërisë, Cakaj e ka quajtur ‘lajm fantastik’ për diplomacinë e Shqipërisë.

“Ky vendim është në shërbim të zbatimit të strategjisë të Ministrisë për Evropën dhe Punët e Jashtme për të zgjeruar rrjetin e ndërveprimit politik ndërkombëtar dhe rritur numrin e përfaqësive diplomatike të Shqipërisë nëpër botë në përgjithësi”, ka shkruar Cakaj.

Çfarë rëndësie do të ketë kjo ambasadë për Shqipërinë?

Sipas Cakajt, rëndësia e këtij vendimi duhet parë edhe në një rrafsh më të përgjithshëm politik dhe diplomatik.

Deri më tash, mbulimi i marrëdhënieve diplomatike të Republikës të Shqipërisë me Australinë dhe me disa prej vendeve të Azisë dhe Paqësorit është mbuluar krejtësisht nga Ambasada e Shqipërisë në Pekin. Në këtë mënyrë, sipas tij, kapaciteti veprues i Shqipërisë në këtë hapësirë gjeopolitike ka qenë më i ulët sesa vetë rëndësia gjeostrategjike e saj.

“Për më shumë, hapja e Ambasadës në Kanberra do të mundësojë intensifikimin e marrëdhënieve diplomatike, politike dhe ekonomike midis Shqipërisë dhe Australisë. Tutje, kjo Ambasadë do të ketë një funksion shumë të rëndësishëm edhe në ofrimin e shërbimeve konsullore për shqiptarët (dhe jo vetëm) në Australi (dhe jo vetëm). Sipas pritjeve paraprake, Ambasada në Kanberra do të ofron afërsisht 4000-5000 praktika konsullore brenda një viti kalendarik”, ka shkruar Cakaj.

Për fund, Cakaj ka shkruar se do të vazhdojnë me veprime të ngjashme, me qëllim që ta bëjnë Shqipërinë më të pranishme në botë.

---